سابق وزیراعظم اور مسلم لیگ نون کے ناراض رہنما شاہد خاقان عباسی کے نام سے بنائے گئے سوشل میڈیا اکاؤنٹس تحریک انصاف کے حق میں استعمال ہونے لگے۔
ذرائع کا کہنا ہے کہ تحریک انصاف کے حامی سوشل میڈیا ایکٹیوسٹ شاہد خاقان عباسی کی پارٹی قیادت سے ناراضگی کو کیش کرا رہے ہیں اور ان کے نام سے بنائے گئے جعلی ٹویٹر اکاؤنٹس کے ذریعے یہ تاثر دیا جا رہا ہے کہ وہ تحریک انصاف کی قیادت اور اس کے اقدامات کی حمایت کر رہے ہیں۔
یہ امر قابل ذکر ہے کہ شاہد خاقان عباسی اپنے اصل ٹویٹر اکاؤنٹ سے بارہا یہ اعلان کر چکے ہیں کہ ان کا اس کے علاوہ کوئی اور اکاؤنٹ نہیں ہے اور یہ کہ وہ یا تو اس ٹویٹر اکاؤنٹ کے ذریعے یا پھر براہ راست عوام سے منتخب ہونا پسند کرتے ہیں۔ عام طور پر وہ سوشل میڈیا کے ذریعے اپنا پیغام نہیں پہنچاتے تاہم اس کے باوجود شاہد خاقان عباسی کے نام سے بنائے گئے ٹویٹر اکاؤنٹس تحریک انصاف کی حمایت اور مسلم لیگ نون کی مخالفت میں استعمال کیے جا رہے ہیں۔
شاہد خاقان عباسی کے اصلی اور جعلی ٹویٹر اکاؤنٹس کا عکس
اس کی ایک مثال یہ ہے کہ تحریک انصاف کے نئے چیئرمین کے انتخاب کے حوالے سے ٹویٹ کو شاہد خاقان عباسی سے منسوب ٹوٹر اکاؤنٹ سے ری پوسٹ کیا گیا ہے۔ پی ٹی ائی کے خلاف خواجہ آصف کی ٹویٹ کے جواب میں اسی طرح کے ایک اکاؤنٹ سے پی ٹی ائی کا دفاع اور نواز لیگ کی مخالفت کی گئی ہے۔
واضح رہے کہ سابق وزیراعظم شاہد خاقان عباسی جن کا حلقہ انتخاب مری کہوٹہ اور راولپنڈی کے بعض علاقے ہیں وہ ایک روایتی اور وضعدار سیاستدان کی شہرت رکھتے ہیں اور عام طور پر سوشل میڈیا سے دور رہتے ہیں، البتہ مختلف ٹی وی چینلز پر تواتر کے ساتھ ان کے انٹرویوآتے رہتے ہیں۔
Accounts attributed to Shahid Khaqan started being used, شاہدخاقان سےمنسوب اکاؤنٹس تحریک انصاف کیلئےاستعمال ہونے لگے
