ہمیں سلیکٹڈ کہنے والے خود سلیکٹڈ پلس بن چکے، اسد قیصر

پاکستان تحریک انصاف (پی ٹی آئی) کے سینئر رہنما اور سابق اسپیکر قومی اسمبلی اسد قیصر نے کہا ہے کہ ہم پر سلیکٹڈ کا الزام لگانے والے خود سلیکٹڈ پلس بن چکے ہیں۔

عدالت کے باہر میڈیا سے گفتگو میں اسد قیصر نے کہا کہ موجودہ ماحول میں انتخابات ہوئے تو کوئی بھی انہیں تسلیم نہیں کرے گا۔

ان کا کہنا تھا کہ تحریک انصاف کو سلیکٹڈ کہنے والی اُس وقت کی اپوزیشن اب خود سلیکٹڈ پلس بن چکی ہے۔

پی ٹی آئی رہنما نے مزید کہا کہ بہتر ہوگا نواز شریف کو اُسی طرح نوٹیفکیشن سے وزیراعظم بنادیں، جیسے انوارالحق کاکڑ کو بنایا گیا ہے۔

انہوں نے یہ بھی کہا کہ پی ٹی آئی پر جو بھی ظلم ہورہا ہے وہ نواز شریف اور مسلم لیگ ن کی وجہ سے ہورہا ہے۔

اسد قیصر نے کہا کہ الیکشن کمیشن کی طرف سے انٹرا پارٹی انتخابات کا معاملہ پی ٹی آئی کی لیگل ٹیم دیکھ رہی ہے۔