"ضمانت میں توسیع۔۔مگر نواز شریف وجہ بتائیں کہ اشتہاری کیوں ہوئے؟”

اس سے قبل اسلام آباد کی احتساب عدالت نے سابق وزیراعظم نواز شریف کی توشہ خانہ ریفرنس میں ضمانت کی درخواست منظور کرلی۔ لیگی قائد کو 10 لاکھ روپے کے مچلکے عدالت میں جمع کرانے کا حکم دیتے عدالت نے سماعت 20 نومبر تک ملتوی کردی ہے۔

واضح رہے کہ اسلام آباد ہائی کورٹ نے منگل کے روز سابق وزیراعظم نواز شریف کے خلاف العزیزیہ ریفرنس اور ایون فیلڈ ریفرنس میں اپیلوں سے متعلق درخواستوں کی سماعت کی ہے۔سابق وزیراعظم  نے  دونوں ریفرنسز میں اسلام آباد ہائی کورٹ کے سامنے سرنڈر کر دیا ہے۔

یہ امر قابل ذکر ہے کہ نوازشریف توشہ خانہ کیس میں اسلام آباد کی احتساب عدالت میں پیشی  کے بعد اسلام آباد ہائی کورٹ پہنچے تھے جہاں ان کے سرنڈر کے بعد چیف جسٹس عامر فاروق کی سربراہی میں دو رکنی بینچ نے کیس کی سماعت کی۔

عدالت اور نیب کے نمائندے کے درمیان دلچسپ مکالمہ

اس موقع پر عدالت نے نیب کے نمائندے سے استفسار کیا کہ اپ کو ضمانت کی توسیح پر کوئی اعتراض ہے؟ جس پر انہوں نے نفی میں جواب دیا۔اس پر اسلام آباد ہائی کورٹ کے جج جسٹس گل حسن اورنگزیب نے نیب کے پراسیکیوٹر جنرل سے دوبارہ پوچھا کہ شریعت کے تقاضے پورے کرتے ہوئےآپ بتائیں کہ کیا اپ نواز شریف کو گرفتار کرنا چاہتے ہیں ؟ کیا نیب یہ کہنا چاہتا ہے کہ نواز شریف پر کرپشن اور کرپٹ پریکٹسز کا الزام برقرار ہے لیکن انہیں چھوڑ دیا جائے ؟

اس پر نیب پروسیکیوٹر نے کہا کہ نیب نواز شریف کو گرفتار نہیں کرنا چاہتی ؟ عدالت عالیہ کے استفسار پر بتایا گیا کہ چیئرمین نیب اس وقت ملک میں موجود نہیں ہیں ۔

سماعت کے آغاز پر چیف جسٹس نے ریمارکس دیے کہ اپیلوں کی بحالی معمول کا معاملہ نہیں ہے، عدالت کو مطمئن کرنا ہوگا کہ آپ کے موکل اتنا عرصہ عدالت سے غیر حاضر کیوں رہے؟ عدالت میں پیش کیوں نہیں ہوئے ۔اس پر نواز شریف کے وکیل اعظم نذیر تارڑ نے کہا کہ میرے موکل جان بوجھ کر غیر حاضر نہیں ہوئے بلکہ عدالت کی جانب سے اجازت ملنے پر بیرون ملک علاج کے لیے گئے تھے اور اس حوالے سے میڈیکل رپورٹس باقاعدگی سے عدالت میں جمع کرائی جاتی رہی ہیں ۔

چیف جسٹس نے کہا کہ یہ معاملہ اسلام آباد ہائی کورٹ کا تھا مگر اپ لوگ دوسری عدالت چلے گئے ۔اس کی وجہ کیا تھی ؟ اس پر اعظم مزید تارڑ نے کہا کہ دوسری عدالت سے ریلیف ملنے کے حوالے سے ہم نے اس عدالت کوآگاہ کر دیا تھا۔ بعد ازاں عدالت نے نواز شریف کی حفاظتی ضمانت میں 26 اکتوبر تک توسیع کر دی ہے۔

نواز شریف احتساب عدالت میں میڈیا سے گفتگو کیے بغیر روانہ

قبل ازیں اسلام آباد کی احتساب عدالت نے  توشہ خانہ ریفرنس میں نواز شریف کی ضمانت کی درخواست منظور کرلی۔ لیگی قائد کو 10 لاکھ روپے کے مچلکے عدالت میں جمع کرانے کا حکم دیتے عدالت نے سماعت 20 نومبر تک ملتوی کردی۔

واضح رہے کہ گزشتہ سماعت پر احتساب عدالت نے نواز شریف کے دائمی وارنٹ گرفتاری آج تک کے لیے معطل کردیے تھے اور کہا تھا کہ اگر نواز شریف 24 اکتوبر تک پیش نہ ہوئے تو ان کے وارنٹ گرفتاری پرعملدرآمد کرایا جائے گا۔

سماعت  کے بعد نواز شریف کمرہ عدالت میں میڈیا سے گفتگو کیے بغیر روانہ ہوگئے۔نواز شریف کی پیشی کے موقع پر  اسلام آباد جوڈیشل کمپلیکس پر سیکیورٹی کے سخت انتظامات کیے گئے ہیں۔