دو فٹ کی بلند قامت گیتا کی ولولہ انگیز کہانی

دو فٹ کی بلند قامت گیتا کی ولولہ انگیز کہانی

چند برس پہلے ایم بی اے کی ڈگری لے کر در در بھٹکنے والی دو فٹ کی گیتا اب لوگوں کو خود نوکریاں دیتی ہے۔گیتا کو اپنے سماج سے دردآمیز شکوہ ہے۔۔وہ کہتی ہے کہ سب لوگوں نے میری صرف شکل دیکھی میری صلاحیت کو نہیں آزمایا۔

بی بی سی کی رپورٹ کے مطابق گیتا نے ماسٹرز ان بزنس ایڈمنسٹریشن یعنی ایم بی اے کیا ہے اور اس کے ساتھ ساتھ کو آپریٹو مینجمنٹ میں ڈپلومہ بھی حاصل کیا ہے۔
گیتا کی عمر 31 برس ہے۔بی بی سی سے گفتگو کرتے ہوئے گیتا نے بتایا کہ وہ گھر کے حالات بہتر بنانے کے لیے ملازمت کرنا چاہتی تھی۔اس کے لیے در در اور دفتر دفتر گھومتی رہی مگر چھوٹے قد کی وجہ سے ملازمت حاصل کرنے میں کامیابی نہ مل سکی ۔گیتا کے مطابق جب کبھی وہ کہیں انٹرویو دینے کے لیے جاتی تو انٹرویو کے بعد یہ کہہ کر ٹال دیا جاتا کہ آپ کو فون پر بتا دیں گے۔مگر پھر حسب توقع کوئی کال نہ اتی۔

گیتا کے مطابق مسلسل ناکامیوں کے بعد بالاخر انہوں نے اپنا کاروبار شروع کرنے کا فیصلہ کیا۔
گیتا نے طے کیا کہ وہ معذور لوگوں کو ملازمت دے گی۔
اس سوچ نے کئی معذور افراد کو گیتا کا دوست بنا دیا اور پھر انہوں نے مل کر کام شروع کر دیا۔گیتا کی ایک دوست جیوتی منی کے پاس سلائی مشین تھی۔دونوں نے مل کر ایک دکان تلاش کی اور پھر وہاں سے سلسلہ چل نکلا۔
کبھی خود ملازمت کے لیے بھٹکنے والی گیتا اپنے کپڑے کے کاروبار میں اتنی کامیاب ہو چکی ہے کہ وہ دوسروں کو ملازمت دے رہی ہے۔
اس کی دکان سے ہر وقت مشین چلنے کی آواز اتی ہے اور کپڑوں کا ڈھیر بنتا چلا جاتا ہے۔

گیتا کے کاروبار نے ایک تنظیم کی شکل اختیار کر لی ہے ۔اور کئی خواتین کو اپنا اپنا گھر چلانے کا سہارا مل گیا ہے۔دکان اب گارمنٹس فیکٹری کی صورت اختیار کر چکی ہے جہاں کئی معذور خواتین مل جل کر کام کرتی ہیں۔
گیتا کا کہنا ہے کہ میرا خواب ہے کہ کسی بھی معذور کو اس کی جسمانی حالت کی وجہ سے کبھی کام کے لیے مسترد نہ کیا جائے جیسا کہ میرے ساتھ کیا جاتا رہا ۔وہ فخر سے بتاتی ہے کہ اب ہم ٹھکرائے جانے والے معذور افراد کو زیادہ سے زیادہ ملازمت دے رہے ہیں۔گیتا کے بقول جسمانی معذوری کوئی رکاوٹ نہیں ہے۔ہر کسی میں کوئی نہ کوئی صلاحیت موجود ہوتی ہے۔
اگر میں یہ سوچتی کہ میں معذور ہوں تو میں کچھ بھی نہیں کر سکتی تھی۔مگر میرے پاس اعتماد کے ساتھ ساتھ مہارت بھی تھی چنانچہ میں نے گارمنٹس یونٹ شروع کیا اور اپنے جیسے لوگوں کو ملازمت دینا شروع کی۔ گیتا کے نزدیک زندگی میں کامیابی کا گر یہ ہے کہ آپ ناکامیوں یا کمیوں کو اپنے اوپر حاوی نہ ہونے دیں ۔میں نے خود یہ سب کچھ کر کے ایک مثال قائم کی ہے۔