عمرہ زائرین کی آڑ میں سعودیہ جانیوالے مزید 4 بھکاری گرفتار

وفاقی تحقیقاتی ادارے  ایف آئی اے نے عمرے کی آڑ میں بھیک مانگنے کے لیے سعودی عرب جانے والے مزید 4 ملزمان کو گرفتار کرلیا۔واضح رہے کہ قبل ازیں ملتان ائر پورٹ سے بھکاریوں کا ایک گینگ پکڑا گیا تھا جس نے بتایا تھا کہ سعودی عرب بھیجنے والے ایجنٹ سے بھیک کی رقم سے ملنے والی 50 فیصد آمدنی بطور کمیشن طے ہے۔

جمعہ کے روز ایف آئی اے کے اینٹی ہیومن ٹریفکنگ سرکل لاہور نے کارروائی کرتے ہوئے ائرپورٹ سے 4 ملزمان کو گرفتار کیا جن میں 2 خواتین اور 2 مرد شامل ہیں۔ ترجمان ایف آئی اےکے مطابق ملزمان کو ایف آئی اے امیگریشن نے لاہور ائیرپورٹ پر آف لوڈ کیا، ملزمان بھیک مانگنے کے لیے متعدد بار سعودی عرب، ایران اور عراق جاچکے ہیں، ملزمان کو سعودی عرب پہنچنے پر پاکستانی ایجنٹوں نے وصول کرنا تھا۔

ترجمان کے مطابق  مذکورہ ملزمان نے بھی بتایا کہبھیک کے ذریعے کمائی کی گئی رقم کاآدھا حصہ ایجنٹ کو دینا تھا۔ ترجمان ایف آئی اے کا کہنا ہےکہ ملزمان اور ایجنٹوں کے خلاف مقدمہ درج کرکے تفتیش شروع کردی گئی ہے۔