استور ندی میں ڈوب کر جاں بحق ہونے والا عباسیاں کاحماد سپرد خاک

یونین کونسل بیروٹ عباسیاں کا رہائشی نوجوان حماد ولد محمد نواز عباسی  35 روز قبل گلگت جاتے ہوئے راستے میں استور ندی پر نہانے کی غرض سے رکا تھا کہ پاؤں پھسلنے کے باعث لہروں کی نذر ہو گیا۔حماد عباسی کے عزیز و اقارب ریسکیو اہلکار اور مقامی لوگ گزشتہ ایک ماہ سے اس کی میت کی تلاش میں مصروف تھے جبکہ والدین سمیت خاندان غم سے نڈھال تھا۔

دو روز قبل حماد کی لاش استور نالے سے ملی جسے مقامی ریسکیو اہلکاروں نے 35 روز بعد نکالا۔منگل کے روز حماد کی نماز جنازہ ادا کی گئی جس کے بعد اسے آبائی قبرستان میں سپرد خاک کر دیا گیا۔ نماز جنازہ میں عزیز و اقارب سمیت علاقے کے عوام اور دور دراز سے انے والے افراد نے بڑی تعداد میں شرکت کی۔اس موقع پر ہر آنکھ اشکبار تھی۔ واضح رہے کہ مرحوم کے والد محمد نواز عباسی ٹرانسپورٹر ہیں اور حماد خود ٹرک چلا کر رزق حلال کے ذریعے کنبے کی کفالت کرتا تھا۔