ساڑھے بارہ کروڑ بجلی بل نادہندہ ماسٹر ٹائلز گوجرانوالہ کا مالک گرفتار

تفصیلات کے مطابق بجلی چوری اور نادہندگان کے خلاف حالیہ مہم کے دوران 12 کروڑ 36 لاکھ روپے کے بل نادہندہ ہونے پر ماسٹر ٹائلز گوجرانوالہ کے ڈائریکٹر شیخ محمود کے خلاف مقدمہ درج کرکے انہیں گرفتار کر لیا گیاہے۔

ذرائع کے مطابق شیخ محمود اقبال  گوجرانوالہ الیکٹرک کمپنی (گیپکو) کا سب سے بڑا ڈیفالٹر نکلا ، جو بجلی کمپنی کو 13 کروڑ کے چیک دے کر چکر چلا رہا تھا۔

یہ امر قابل ذکر ہے کہ ماسٹر ٹائلز کے مالکان کے ماسٹر ٹائلز کے علاوہ بھی ٹرانسپورٹ کمپنی سمیت کھربوں روپے مالیت کے درجنوں بزنس ہیں اور وہ اپنی شاہ خرچیوں کے حوالے سے خاصی شہرت رکھتے ہیں۔

بیٹی کی مہنگی ترین شادی کا اعزاز حاصل کرنے پر ایف بی آر نے نوٹس جاری کیا تھا

یہاں یہ ذکر کرنا دلچسپی سے خالی نہ ہو گا کہ 2020 میں پاکستان کی "مہنگی ترین” شادی کی تصاویر وائرل ہونے کے بعد ایف بی آر نے ماسٹر ٹائلز کے ڈائریکٹر کو نوٹس جاری کر کے شادی کی تقریبات میں کیے جانے والے غیر معمولی اخراجات کی وضاحت طلب کی تھی۔

یہ نوٹس گوجرانوالہ کے چیف کمشنر ان لینڈ ریونیو کی جانب سے ماسٹر ٹائلز کے ڈائریکٹر شیخ محمد اقبال کو جاری کیا گیاتھا جس میں ان سے بیٹی کی شادی کی تقریبات میں  بھاری اخراجات کی وضاحت طلب کی گئی تھی۔

نوٹس کے مطابق شادی کی تقریبات 5 سے 7 نومبر 2020 تک جاری رہی تھیں جس میں روزا بلانکا کلب لاہور نے کیٹرنگ جبکہ کے ایس سی کانسیپٹ نے ایونٹ پلاننگ جبکہ عرفان احسن نے فوٹوگرافی کی خدمات سرانجام دی تھیں۔