غربت سے تنگ دو مائیں 6 بچوں سمیت زندگی کی قید سے آزاد

تفصیلات کے مطابق کوئٹہ میں غربت اور تنگ دستی کے باعث آئے روز کے گھریلو جھگڑے سے تنگ آکر مبینہ طور پر ماں نے چار بچیوں کو زہر کھلانے کے بعد اپنی زندگی ختم کر لی۔ ہزارہ ٹاؤن میں 35 سالہ فاطمہ نے زہر کھانے سے پہلے چار بچیوں کو زہر دیا جس کے بعد سب کی حالت غیر ہوگئی۔ اطلاع ملنے پر پولیس اور ریسکیو ٹیمیں جائے وقوعہ پر پہنچیں، متاثرہ تمام افراد کو اسپتال منتقل کیا گیا۔ پولیس کے مطابق ماں اور دو بچیاں موقع پر ہی دم توڑ گئیں جبکہ دو بچیاں اسپتال میں دوران علاج چل بسیں۔ ہلاک ہونے والی بچیوں میں تین سالہ علینہ، چھ سالہ ارینہ، آٹھ سالہ ماہدہ اور دس سالہ زاہدہ شامل ہیں۔

پولیس کا کہنا ہے کہ غربت کے باعث واقعہ پیش آیا، مزید تفتیش جاری ہے۔ ادھر اوکاڑہ کے علاقے بصیرپور میں بھی غریب خاتون نے شوہر سے جھگڑے پر 2 بیٹیوں سمیت زہرکھاکر زندگی کا خاتمہ کرلیا۔ 28 سالہ نسرین بی بی اور اس کی 2 بیٹیوں 8 سالہ رضوانہ اور 6 سالہ تائبہ کی زہر خورانی سے ہلاکت کا واقعہ بصیرپورکےمحلہ احمد شاہ میں پیش آیا۔ اوکاڑہ پولیس کے مطابق نسرین کا اپنےشوہر رمضان سے جھگڑا ہوا تھا جس پر دلبرداشتہ ہو کر اس نے پہلے اپنی بیٹیوں رضوانہ اور تائبہ کو زہر دیا بعدازاں اس نے خود بھی زہر کھالیا، تینوں ماں بیٹیوں کو تشویشناک حالت میں اسپتال منتقل کیا گیا مگر وہ جانبر نہ ہوسکیں۔ پولیس نےتینوں لاشیں مردہ خانے منتقل کردیں۔