ملکہ کوہسار مری میں طوفانی بارش نے رت بدل دی

اتوار اورپیر کی رات کو مری اور گردو نواح میں اچانک شدید ژالہ باری کے بعد موسلادھار بارش کاسلسلہ جاری ہوگیا۔سڑکیں ندی نالوں کا منظر پیش کرنے لگیں۔

نکاسی آب کے ناقص نظام کے باعث اہم ترین سیاحتی مرکز مال روڈمری،لوئربازار مری سمیت تمام علاقے برساتی نالوں کا منظر پیش کرنے لگے۔پانی،گندگی اورکچر ے کے باعث مال روڈ پرآنے سے سیاحوں اورمقامی لوگوں کو شدیدمشکلات کاسامنارہا،

شدیدبارش کے باعث کئی علاقوں میں لینڈسلائیڈنگ کی بھی اطلاعات بھی موصول ہوئی ہیں تاہم کوئی جانی نقصان نہیں ہوا،تیز ہواؤں،ژالہ باری اورشدیدبارش کے باعث سردی کی شدت میں بھی اضافہ ہوگیا ہے۔

اتوار کے بعد پیر کے دن بھی ہلکی بارش، گہرے بادلوں،دھند اورسرد ہواؤں کا سلسلہ جاری رہا،توقع کی جارہی ہے کہ اگر شدید بارشوں،ژالہ باری اورتیز ہواؤں کایہ سلسلہ جاری رہا تو جلد برفباری کاآغاز بھی ہوجاسکتا ہے۔

دوسری طرف عوامی،سیاحتی اورکاروباری حلقوں نے کمشنر،ڈپٹی کمشنر راولپنڈی اورایڈیشنل کمشنر و ایڈمنسٹریٹر میونسپل کارپوریشن مری سے مطالبہ کیا ہے کہ مری کے نکاسی آب اورسیوریج سسٹم کو بہترکرنے کے فوری اقدامات کئے جائیں تاکہ برفباری کے موسم میں مشکلات کم ہوسکیں۔