نواز شریف کے استقبال کیلئے 10لاکھ افراد جمع کرنے کا ہدف ؟

21 اکتوبر کو مسلم لیگ نون کے سربراہ میاں نواز شریف کے فقید المثال استقبال کےلیے تیاریاں شروع کر دی گئی ہیں اور مسلم لیگ نون کی قیادت کی جانب سے ارکان اسمبلی اور عہدے داروں کو مینار پاکستان لاہور پر 10 لاکھ افراد جمع کرنے کا ٹاسک دیا گیا ہے۔تاہم پارٹی ذرائع کا کہنا ہے کہ اگر اس ہدف کا نصف بھی جمع کرنے میں کامیاب ہو جاتے ہیں تو اسے بہت بڑی اور تاریخی کامیابی تصور کیا جائے گا۔

واضح رہے کہ نواز شریف کی وطن واپسی اور استقبال کے حوالے سے دو سے زائد زائد مرتبہ پلان تبدیل ہو چکا ہے۔پہلی تجویز کے طور پر مسلم لیگ نون کے قائد کو اسلام اباد ایئرپورٹ پر اترنا تھا تاہم بعد ازاں طے کیا گیا کہ وہ لاہور ایئرپورٹ پر اتریں گے اور ایئرپورٹ پر ہی ان کا عظیم الشان استقبال کیا جائے گا جس میں دس لاکھ کے قریب لوگ جمع کیے جائیں گے۔

ذرائع کا کہنا ہے کہ گزشتہ روز پارٹی رہنماؤں کے لاہور میں منعقدہ اجلاس میں ایک بار پھر پلان میں تبدیلی کی گئی اور یہ طے کیا گیا کہ ایئرپورٹ کے بجائے کارکنوں کو مینار پاکستان پر جمع کیا جائے جہاں نواز شریف ان سے خطاب کریں۔تاہم یہ اجتماع اتنا بڑا اور تاریخی ہو کہ اس کے نقش انے والے الیکشن پر ثبت ہو جائیں۔

ماڈل تحریک انصاف کا سونامی جلسہ یا بے نظیر بھٹو کا فقیدالمثال استقبال؟

سابق وزیر اعظم محمد نواز شریف دبئی سے اٹلی پہنچ گئے

ذرائع کا کہنا ہے کہ مسلم لیگ نون کی قیادت نے اپنے رہنماؤں کو 2011 کے تحریک انصاف کے سونامی جلسے کو بیٹ کرنے کا ہدف دیا ہے تاہم اس بات کو عام نہیں کیا گیا تاکہ یہ تاثر نہ ملے کہ مسلم لیگ نون تحریک انصاف کی مقبولیت سے خوفزدہ ہے یا اس کی تقلید کر رہی ہے۔ اسی طرح لیگی قیادت کے ذہن میں بے نظیر بھٹو کا 1986 کا فقید المثال استقبال بھی ہے جب وہ ضیاء الحق کے دور میں جلا وطنی سے واپس ائی تھی۔پاکستان کی سیاسی تاریخ میں یہ چند بڑے اجتماعات میں سے ایک تھا۔

لیگی ذرائع کے مطابق اتنے بڑے جلسے کے لیے یقینی طور پر کروڑوں نہیں شایدارب روپے سے بھی زیادہ درکار ہوں تاہم فنڈ ریزنگ نواز لیگ کے لیے کبھی کوئی بڑا مسئلہ نہیں رہا کیونکہ اس کے رہنماؤں اور فنانسرز میں کئی بڑے بزنس مین شامل ہیں البتہ اس سے بڑا اور مشکل ٹاسک لوگوں کو جمع کرنے کا مطلوبہ ہدف پورا کرنا ہے۔

سینئر تحقیقاتی صحافی وسیم عباسی کے مطابق مینار پاکستان کی جلسہ گاہ بھرنے کے لیے سابق ارکان صوبائی اسمبلی کو فی کس 3600 افراد جمع کرنے کا ہدف دیا گیا ہے جبکہ ارکان قومی اسمبلی کے لیے یہ ہدف ڈبل یا اس سے زیادہ ہو سکتا ہے ۔رپورٹ کے مطابق یہ بھی طے کیا گیا ہے کہ مینار پاکستان کہ احاطے میں شرکاء کے لیے ایک لاکھ نشستوں کا انتظام کیا جائے گا جبکہ باقی لوگ کھڑے ہو کر خطابات سنیں گے۔قبل ازیں 50 ہزار نشستوں کا انتظام کرنے کا فیصلہ کیا گیا تھا۔
علاوہ ازیں جلسہ گاہ تک لوگوں کو لانے کے لیے ٹرانسپورٹ سروس کا انتظام بھی کیا جائے گا جس کے لیے ارکان اسمبلی اور پارٹی رہنماؤں کو ذمہ داریاں تفویض کر دی گئی ہیں ۔

مریم نواز اور حمزہ شہباز بیک وقت متحرک

مسلم لیگ ( ن ) کی چیف آرگنائزر مریم نواز وطن واپس پہنچ گئیں (فائل فوٹو)

ذرائع کا کہنا ہے کہ جلسے کو کامیاب بنانے کے لیے مرکزی ذمہ داری مریم نواز اور حمزہ شہباز کو دی جا رہی ہے ان میں سے اول الذکر جنوبی پنجاب جبکہ آخر الذکر وسطی پنجاب کے تنظیمی دورے کر رہے ہیں تاکہ لوگوں کو موبلائز کیا جا سکے ۔
واضح رہے کہ مریم نواز نے چند روز پہلے اسلام آباد سمیت شمالی پاکستان کا دورہ کیا اور کے پی کے کی تنظیم کو بھی متحرک کیا گیا۔ امکان ہے کہ ملک بھر کی پارٹی تنظیمیں نواز شریف کے استقبالی جلسے میں شرکت کیلئے لوگوں کو لے کر پہنچیں گی۔ذرائع کے مطابق پارٹی رہنماؤں کو خبردار کیا گیا ہے کہ مسلم لیگ نون نواز شریف کے اس استقبالی جلسے کو اپنی سیاسی زندگی اور موت کا مسئلہ تصور کرتی ہے لہذا اس شو کو کسی صورت ناکام یا فلاپ نہیں ہونا چاہیے۔

نواز لیگ کا انتخابی بیانیہ کیا ہوگا ؟

مسلم لیگ نون کو جن مشکل حالات میں الیکشن کا سامنا ہے ،ان حالات میں انتخابی بیانیے کو ٹھوس شکل دینا ایک مشکل کام ہوگا تاہم ذرائع کا کہنا ہے کہ نواز لیگ نے اس حوالے سے بڑی حد تک حکمت عملی مرتب کر لی ہےاور معاشی بحالی کا نعرہ ہی اس کا انتخابی بیانیہ ہوگا جس کے لیے نواز لیگ کے سابق ادوار میں ہونے والے ترقیاتی کام اور معاشی اہداف کے حصول میں کامیابی کے اعداد و شمارکو عوام کے سامنے رکھا جائے گا۔واضح رہے کہ 2018 میں ہونے والے الیکشن میں "ووٹ کو عزت دو اور مجھے کیوں نکالا "کا بیانیہ استعمال کیا گیا تھا تا ہم وہ تحریک انصاف کے سونامی کے سامنے نہیں ٹھہر سکا۔

لیگی ذرائع کے مطابق انتخابی مہم کے دوران سیاسی مظلومیت کا تاثر قائم کر کے سابق آرمی چیف جنرل باجوہ ، سابق ڈی جی ائی ایس ائی جنرل فیض حمید اور سابق چیف جسٹس ثاقب نثار کو بھی نشانے پر رکھا جائے گا تاکہ عوام کا لہو گرمایا جا سکے۔ اس حوالے سے نواز شریف نے گزشتہ روز اپنے خطاب میں ان میں سے چند ایک نام لے کر اشارہ بھی دے دیا ہے۔تاہم مجموعی طور پر نواز شریف خود کو ایک سیاسی اسٹیٹس مین کے طور پر پیش کریں گے جو انتقامی سیاست پر یقین نہیں رکھتا اور ملک کی معاشی کشتی کو بھنور سے نکالنے کے لیے ذاتی انا اور مسائل سے بالاتر ہو کر سوچنے کے لیے تیار ہے۔

Target of gathering 10 lakh people to welcome Nawaz Sharif? نواز شریف کے استقبال کیلئے 10لاکھ افراد جمع کرنے کا ہدف ؟