سانحہ بلدیہ کیس پر عدالتی فیصلہ ایم کیو ایم کیخلاف کھلی چارج شیٹ

سندھ ہائی کورٹ نے سانحہ بلدیہ فیکٹری کیس میں ملزمان کی اپیلوں کے فیصلہ میں نا صرف پولیس کی جانب سے کی جانے والی تفتیش کے پرخچے اڑا کر رکھ دیئے ہیں بلکہ حکومتی اداروں کی غفلت اور لاپرواہی کی بھی نشاندہی کی ہے ، عدالت عالیہ کے اس فیصلہ کو سانحہ بلدیہ فیکٹری کے حوالے سے ایم کیو ایم کے خلاف چارج شیٹ کہاجائےتو بے جا نہ ہوگا ۔۔۔
عدالتی فیصلہ کے مطابق ایک جانب گمراہ کن ایف آئی آر کاٹ کر کیس کو غلط رخ پر ڈالنے کی کوشش کی گئی تو دوسری جانب سرکاری اداروں نے اپنی ذمہ داریاں ادا نہیں کیں ۔۔
260 سے ذائد افراد کے لرزہ خیز قتل کے الزام میں انسداد دہشت گردی عدالت نے ایم کیو ایم پاکستان کے کارکنوں عبدالرحمان بھولا ؤر زبیر عرف چریا کو بائیس ستمبر 2020 کو پھانسی کی سزا سنائی تھی ۔۔ اب اے ٹی سی کے فیصلہ کے خلاف اپیلوں پر سندھ ہائی کورٹ نے فیصلہ سنادیا ہے جس پر ایم کیو ایم پاکستان کی قیادت نے پرزور احتجاجی پریس کانفرنس کی ہے ۔۔ یہ فیصلہ سندھ ہائی کورٹ کے جج جسٹس کریم خان آغا نے تحریری کیا ہے جو دو رکنی اپیلٹ بینچ کے سربراہ تھے ۔ جسٹس کریم خان آغا کچھ برسوں سے سندھ ہائی کورٹ میں فوجداری مقدمات میں اپیلوں کی سماعت کررہے ہیں اور اس حوالے سے ان فوجداری قوانین کے ماہرین ان کے فیصلوں کو سراہتے ہیں اور ایسا کم ہی ہوا ہے کہ اپیلوں پر سنایا گیا فیصلہ سپریم کورٹ میں چیلنج کیا گیا ہو ۔۔۔۔۔

ایم کیو ایم پاکستان کا اعتراض کیا ہے۔۔۔۔؟

ایم کیو ایم رہنما حماد صدیقی

ایم کیو ایم کی قیادت نے ایک پریس کانفرنس میں سانحہ بلدیہ فیکٹری کیس میں سزاۓ موت پانے والے عبدالرحمان بھولا اور زبیر عرف چریا کو نہ صرف اون کیا بلکہ سندھ ہائی کورٹ کے فیصلہ پر شدید تنقید کی، ایم کیو ایم قیادت کا بنیادی اعتراض ہے کہ عدالت نے مفروضے کی بنیاد پر یہ کہا کہ ایم کیو ایم قیادت کی منظوری کے بغیر اتنا بڑا جرم نہیں ہوسکتا ، ایم کیو ایم کا کہنا ہے یہ حادثہ تھا دہشت گردی نہیں تھی اور یہ حادثہ شارٹ سرکٹ کی وجہ سے رونما ہوا ، فیکٹری میں حفاظتی انتظامات نہیں تھے، فیکٹری مالکان کی غفلت سے انسانی جانوں کا ضیاع ہوا ، ایم کیو ایم رہنمائوں نے پریس کانفرنس میں ایڈوکیٹ فیصل صدیقی کی کتاب کا بھی حوالہ دیا گیا جس میں اس سانحہ کو شارٹ سرکٹ کا نتیجہ قرار دیا گیا ہے ۔۔

خالد مقبول صدیقی

یہاں یہ پہلو بھی اہم ہے کہ انسداد دہشت گردی عدالت میں سانحہ بلدیہ فیکٹری کیس کے ٹرائل کے دوران ایڈوکیٹ فیصل صدیقی کبھی پیش نہیں ہوۓ نہ ہی وہ کیس میں فریق تھے۔ سندھ ہائی کورٹ میں ایڈوکیٹ فیصل صدیقی سندھ ہائی کورٹ میں غیر سرکاری تنظیم پائلر کی جانب سے پیش ہوتے رہے ہیں جس میں متاثرین کو معاوضہ دلوانے کی استدعا کی گئی تھی۔

سندھ ہائی کورٹ کا فیصلہ، ایم کیو ایم کے خلاف چارج شیٹ ۔۔۔۔

سانحہ بلدیہ فیکٹری کیس میں انسداد دہشت گردی عدالت کے فیصلہ کے خلاف اپیل پر سندھ ہائی کورٹ نے اپنے فیصلے میں ایم کیو ایم کو بحیثیت تنظیم چارج شیٹ کیا ہے ۔۔۔ عدالتی فیصلہ میں کہا گیا ہے کہ ایم کیو ایم ایک سیاسی جماعت ہے جسے سندھ کے شہری علاقوں میں عوامی حمایت بھی حاصل ہے اور پارلیمان میں معقول نشستیں بھی حاصل کرتی رہی ہے مگر قیادت کے حکم پر پرتشدد کارروائیاں اس جماعت کا خاصا رہا ہے ،لوگوں کو خوفزدہ کرکے بھتہ وصول کیا جاتا تھا ، عدالتی فیصلہ میں عمران فاروق قتل کیس اور سابق ایم ڈی کے ای ایس سی شاہد حیات قتل کیس کا حوالہ دیتے ہوۓ یہ بھی کہا گیا ہے کہ قیادت کے حکم پر ٹارگٹ کلنگ ایم کیو ایم کی خاصیت رہی ہے ۔۔سانحہ بلدیہ کیس میں گواہوں کے خوفزدہ ہونے اور تاخیر سے سامنے آنے کی وجوہات بھی واضح ہیں ۔۔

عدالت نے ایک اور نکتہ اٹھایا ہے ایم کیو ایم کے ایک سابق رکن رضوان قریشی کی جے آئی ٹی اتفاقاً سندھ ہائی کورٹ میں ایک کیس کے دوران پیش کی گئی تو پتا چلا کہ بلدیہ فیکٹری ( علی انٹرپرائززز) میں گیارہ ستمبر 2012 کو آگ لگائی گئی تھی ۔۔ عدالت نے اپنے فیصلے میں اعلیٰ عدالتوں کے کئی فیصلوں کا حوالہ دیتے ہوۓ یہ کہا کہ گواہوں کے تاخیر سے پیش ہونے کے باوجود ان کے بیانات کا جائزہ لیا جاۓ گا کیوں کہ واضح ہے کہ کراچی میں ایک خوف کی فضا تھی، سندھ ہائی کورٹ نے سپریم کورٹ کے کراچی بے امنی کیس کے فیصلے کا بھی حوالے دیتے ہوۓ کہا ہے کہ خوف کی وجہ سے گواہان عدالت آنے سے گریز کرتے ہیں ۔۔۔عدالت نے یہ بھی کہا کہ ایک ہزار سے زائد مزدوروں کی فیکٹری کو جلانے کا اتنا سنگین فیصلہ ایم کیو ایم کی اعلیٰ ترین قیادت کی منظوری کے بغیر نہیں کیا جاسکتا ، اس واقعے کے بعد ایم کیو ایم کی کراچی تنظیمی کمیٹی کے ذمہ داران سے فیکٹری مالکان کی ایم کیو ایم کے ہیڈ کوارٹر نائن زیرو پر ملاقاتیں ہوئیں، ابتدائی تفتیش میں اس پہلو کو بھی نظر انداز کیا گیا ، عدالت نے اپنے فیصلہ میں ایم کیو ایم کراچی تنظیمی کمیٹی کے سابق سربراہ حماد صدیقی کی عدم گرفتاری پر بھی کئی سوالات اٹھاۓ ہیں اور حماد صدیقی کو دس سال تک قانون کی گرفت میں نا لانے پر متعلقہ اداروں پر بھی برہمی کا اظہار کیا ہے ، متعلقہ حکام کو اس حوالے سے رپورٹ بھی پیش کرنے کا حکم دیا ہے ۔۔

عبدالرحمان بھولا کا اعترافی بیان اور انکار

مرکزی ملزم عبدالرحمان بھولا کا ایک ویڈیو بیان حالیہ دنوں میں زیر گردش ہے جس میں ملزم نے نا صرف سانحہ بلدیہ میں ملوث ہونے سے انکار کیا بلکہ یہ بھی الزام لگایا کہ رینجرز کی جانب سے دبائو ڈال کر اس سے اعترافی بیان لیا گیا تھا ۔ یہاں یہ بھی واضح رہے کہ عبدالرحمان بھولا نے یہ انکار پہلی دفعہ نہیں کیا ۔ عبدالرحمان بھولا نے جوڈیشل میجسٹریٹ کے سامنے ضابطہ فوجداری کی دفعہ 164 کے تحت دیئے گئے بیان میں یہ اعتراف کیا تھا کہ قیادت کی طرف سے اسے علی انٹرپرازئزز کے مالکان سے بھتہ وصولی کا ٹاسک ملا تھا تاہم بھتہ نا ملنے پر فیکٹری میں آگ لگانے کا حکم دیا گیا جس پر اس نے ساتھیوں کے ساتھ مل کر یہ کارروائی کی ، مگر ٹرائل کے دوران انسداد دہشت گردی عدالت کے سامنے ملزم اعترافی بیان سے منحرف ہوگیا ۔۔۔۔

سندھ ہائی کورٹ نے اپنے فیصلہ میں قرار دیا ہے کہ ملزم اگر اپنے بیان سے مکر بھی جاۓ تو واقعاتی شواہد سے اعترافی بیان کا تعلق دیکھنا ضروری ہے ، بظاہر جوڈیشل میجسٹریٹ کے سامنے عبدالرحمان بھولا کے اعترافی بیان میں کوئی بے ضابطگی ثابت نہیں ہوتی ، تمام واقعاتی شواہد بھی اس بیان کو درست ثابت کررہے ہیں ، عدالت نے ایک گواہ ماجد بیگ جو کہ ایم کیو ایم بلدیہ ٹائون کا کارکن تھا کی گواہی کا بھی حوالہ دیا ہے ، ماجد بیگ کے مطابق جولائی 2012 میں ایک دن وہ فیکٹری پروڈکشن انچارج منصور کے آفس میں بیٹھا تھا جہاں عبدالرحمان بھولا بھی موجود تھا، فیکٹری مالک شاہد بھائلہ وہاں آۓ تو عبدالرحمان بھولا نے باہر شاہد بھائلہ سے کچھ دیر تک ڈسکشن کیا ۔ اسی طرح اہم گواہ منصور ( پروڈکشن انچارج ) کا بیان بھی عبدالرحمان بھولا کی فیکٹری میں بلا روک ٹوک آمد اور رقم وصولی کو ثابت کرتا ہے ۔۔
عدالت نے یہ بھی قرار دیا کہ عبدالرحمان بھولا کا اعترافی بیان اور واقعاتی شواہد کے ثابت کرتے ہیں کہ عبدالرحمان بھولا اور زبیر عرف چریا سانحہ کے اہم کردار اور ذمہ دار ہیں ۔

شارٹ سرکٹ یا دہشت گردی ؟؟؟

سندھ ہائی کورٹ نے اپیلوں کی سماعت کے دوران اس پہلو کا بھی تفصیلی جائزہ لیا ہے کہ واقعی آگ لگائی گئی یا شارٹ سرکٹ ہونے کا دعویٰ درست ہے ؟ عدالت نے کہا کہ پنجاب فرانزک لیبارٹری رپورٹ کے مطابق گودام میں آگ بھڑکانے کے لیے زبیر اور اس کے ساتھیوں نے آتش گیر مادہ پھینکا ، فرانزک رپورٹ میں یہ واضح ہوا ہے فیکٹری میں آگ شارٹ سرکٹ کی وجہ سے نہیں لگی تھی۔ اس بات کے بھی شواہد موجود ہیں کہ فیکٹری میں تازہ وائرنگ ہوئی تھی ، شارٹ سرکٹ اور آگ لگنے کے بعد چند منٹ میں بریکر بند کردئیے گئے تھے۔

علاوہ ازیں فیکٹری کا بوائلر بھی ٹھیک حالت میں تھا نا وہ پھٹا اور نا اس میں کوئی دھماکہ ہوا ،اسلئے بوائل بھٹنا کی وجہ سے آگ لگنے کا امکان بھی نہیں تھا،سندھ ہائی کورٹ نے اپنے فیصلہ میں تحقیقاتی کمیشن کے کردار پر بھی تنقید کی ہے ، عدالت کا کہنا ہے کہ کمیشن نے آگ لگنے کی وجہ جاننے کیلئے کیمیکل ایگزامینیشن کرانے سے بھی گریز کیا۔

Court verdict on the Baldia tragedy case, open charge sheet against MQM , سانحہ بلدیہ کیس پر عدالتی فیصلہ ایم کیو ایم کیخلاف کھلی چارج شیٹ