طورخم بارڈر پر دوسرے روز بھی کشیدگی۔ بندش سے ٹرکوں کی قطاریں

تفصیلات کے مطابق پاک افغان طورخم بارڈرپر گزشتہ روز پیش آنے والے واقعے کے بعد جمعرات کو  دوسرے بھی بارڈر ہر قسم کی تجارتی سرگرمیاں اور پیدل آمد ورفت بند رہی۔ جس کے باعث بارڈر کے دونوں اطراف مسافرو، بیماروں اور مال بردار گاڑیوں کو مشکلات کا سامنا ہے۔

مقامی ذرائع کے مطابق طورخم بارڈ انتظامیہ نے ضلع خیبر کے علاقے جمرود کے اس پار راستہ بند کیا ہوا ہے جس کے باعث سیکڑوں گاڑیاں افغانستان جاتے ہوئے راستے میں پھنس گئی ہیں اور اس کے ساتھ پاکستان میں سینکڑوں کی تعداد میں افغانی طورخم بارڈر پر پھنسے ہوئے ہیں،اسی طرح سرحد کی دوسری جانب پاکستانی شہری پھنسے ہوئے ہیں۔
ذرائع کا کہنا ہے کہ اس کے علاوہ سینکڑوں مال بردار گاڑیاں بھی جمرود کے علاقے میں پھنس گئی ہیں جن میں پھل اور دیگر اشیائے خوردونوش موجود ہے جبکہ ڈرائیورز کے مطابق خدشہ ہے کہ اگر بارڈر پر انہیں افغانستان جانے نہیں دیا گیا تو پھل خراب ہوجائیں گے۔

امریکی خبر رساں ایجنسی کی رپورٹ کے مطابق مقامی حکام نے بتایا کہ پاکستان اور افغان طالبان کی افواج کی ایک دوسرے پر فائرنگ شروع کرنے کے بعد بدھ کو مصروف سرحدی گزرگاہ کو بند کردیا گیا تھا۔پاکستانی حکام نے فائرنگ پر افغانستان سیکورٹی فورسز کو مورد الزام ٹھہرایا تھا۔فائرنگ کا سلسلہ 2 گھنٹے تک جاری رہا۔جھڑپ کا آغاز اس وقت ہوا، جب افغان حکام کی جانب سے مرکزی سرحدی گزرگاہ کے قریب ممنوعہ علاقے میں چوکی بنانا شروع کی گئی۔

حکام کا کہنا تھا کہ افغان حکام کے پاس پہلے سے ہی ایک چوکی تھی،جسےعام طور پر لارم پوسٹ کے نام سے جانا جاتا ہے،لیکن انہوں نے پاکستانی حکام سے بات کیے بغیر چھوٹی پہاڑی پر ایک اور چوکی بنانا شروع کردی تھی۔ان کا کہنا تھا کہ سرحدی سیکورٹی حکام نے کراس فائر شروع ہونے سے چند منٹ قبل ایک ملاقات بھی کی تھی،تاہم یہ معلوم نہیں ہوسکا کہ ملاقات کا ایجنڈا کیا تھا اور دونوں ممالک کی سرحدی افواج کے درمیان فائرنگ شروع ہونے کی کیا وجہ تھی۔ایف سی اہلکار کے علاوہ ایک کسٹم کلیئرنگ ایجنٹ بھی شدید زخمی ہوگیا تھا۔اسے فائرنگ شروع ہونے پر ایک تیزرفتار گاڑی نے ٹکر ماری تھی۔افغان صوبے ننگرہار پولیس کے ترجمان عبدالبصیر زابلی نے کہا کہ دونوں ممالک کے حکام جھڑپ کی وجہ کا تعین کرنے کی کوشش کررہے ہیں۔