چترال کی پاک افغان سرحد سے دہشت گرد حملہ۔ 4 جوان شیہد،12 دہشت گرد ہلاک

موصولہ تفصیلات کے مطابق چترال کے علاقے کیلاش میں پاک افغان سرحد پر دہشت گردوں کی جانب سے 2 فوجی چوکیوں پر حملہ کیا گیا جس میں پاک فوج کے 4جوان وطن کی مٹی پر قربان ہو گئے ۔

آئی ایس پی آر کے مطابق دہشت گردوں کی بڑی تعداد نے جدید اسلحے کے ساتھ فوجی چوکیوں پر حملہ کیا، سکیورٹی فورسز نے دہشت گردوں کو مؤثر اور بروقت جواب دیا،  اس دوران  شدید فائرنگ کا تبادلہ ہوا۔  سکیورٹی فورسز نے حملہ پسپا کرکے دہشت گردوں کو بھاری جانی نقصان پہنچایا، فائرنگ کے تبادلے میں 4 جوان شہید اور 12 دہشت گرد ہلاک  ہوئے جبکہ بڑی تعداد میں حملہ آور شدید زخمی بھی ہوئے۔

آئی ایس پی آر کا کہنا ہےکہ دو سرحدی  افغان صوبوں نورستان اور کنڑ میں دہشت گردوں کی نقل وحرکت سے افغان  حکومت کو بروقت آگاہ کر دیا  گیا تھا، فوجی ترجمان نے امید ظاہر کی کہ افغان عبوری حکومت اپنی ذمہ داریاں پوری کرتے ہوئے پاکستان کےخلاف دہشت گردی کی کارروائیوں کے لیے اپنی سرزمین استعمال کرنے نہیں دے گی۔ آئی ایس پی آر کے مطابق ممکنہ دہشتگردوں کے خاتمے کیلیے علاقے میں کلیئرنس آپریشن جاری ہے۔

بیان میں مزید کہا گیا ہے کہ  پاکستان کی سکیورٹی فورسز دہشت گردی کے خاتمےکے لیے پرعزم ہیں، فوجی جوانوں کی یہ قربانیاں ہمارے عزم کو مزید مضبوط کرتی ہیں۔ چترال کے عوام سکیورٹی فورسز کے شانہ بشانہ کھڑے ہیں۔

Terrorist attack from Pak-Afghan border of Chitral. 4 jawans martyrs, 12 terrorists killed