آزاد کشمیر کے وزیراعظم چوہدری انوارالحق نے کہا ہے کہ یوم دفاع پاکستان ہماری فتح ک دن ہے جس کو جوش و جذبے سے منا کر پوری قوم وطن عزیز کے دفاع کا عزم کرنے کے ساتھ ساتھ ان شہداء کو خراج عقیدت پیش کرتی ہے جنہوں نے مادر وطن پر اپنی جان نچھاور کر کے اس کا حق ادا کیا۔
آج ہم ان تمام شہداء کو سلام پیش کرتے ہیں جنہوں نے میدان جنگ سے گلی کوچوں تک اپنے وطن کا دفاع کیا۔پاکستان وہ پودا ہے جسے شہیدوں نے اپنے خون سے سینچا ہے ۔تاریخ عالم میں کچھ قربانیاں ایسی ہیں جن کی کسی پیمانے سے پیمائش نہیں کی جا سکتی اور ایسی ہی قربانیاں کشمیری سبز ہلالی پرچم کی محبت میں مسلسل دے رہے ہیں .سلام ہے ان ماؤں پر جنہوں نے دھرتی کو ایسے بیٹے دئیے،ان بہنوں کو جنہوں نے اس
دھرتی کو اپنے بھائی دئیے،ایسے بھائیوں کو جن کے بھائی اس پاک وطن پر قربان ہو گئے۔
وزیراعظم نے ان خیالات کا اظہار یوم دفاع کے موقع پر کیا ۔انہوں نے کہا کہ نشان حیدر کے حامل پاک فوج کے عظیم شہداء ہمارا فخر ہیں ۔افواج پاکستان نے ایثار و قربانی کی ایسی لازوال داستانوں کو جنم دیا جو ہماری تاریخ کا ایک روشن باب ہیں۔انہوں نے کہا کہ جذبہ ایمانی وہ طاقت ہے جو ہر مرتبہ ہماری افواج کو مشکل اور پریشانی کے سامنے چٹان کی طرح کھڑا کر دیتی ہے۔انہوں نے کہا کہ میں نے اس مرتبہ یوم۔دفاع و شہداء کو بھرپور جوش و جذبے سے منانے کی ہدایت کی اور بیرون ملک کشمیریوں سے بھی اپیل کی کہ وہ پورے اہتمام سے اس دن کو منائیں ۔
