عمران خان کو بیٹوں سے ٹیلی فونک رابطے کی اجازت مل گئی

یہ اجازت عمران خان کو سیکرٹ ایکٹ کے تحت قائم خصوصی عدالت نے دی ہے۔چیئرمین تحریک انصاف نے اپنے وکیل عمیر نیازی اور شیراز احمد ایڈوکیٹ کے ذریعے عدالت میں اپنے بیٹوں سلیمان اور قاسم سے ٹیلی فون پر بات کرنے کی اجازت حاصل کرنے کے لیے درخواست دائر کی تھی۔سیکرٹ ایکٹ عدالت کے جج ابو الحسنات ذوالقرنین نے عمران خان کی یہ درخواست منظور کرتے ہوئے جیل انتظامیہ کو ہدایت کی ہے کہ عمران خان سے بیٹوں کی بات کرانے کے لیے ضروری انتظامات کیے جائیں ۔

واضح رہے کہ تحریک انصاف کے چیئرمین کو توشہ خانہ کیس میں سزا سنائے جانے کے بعد اٹک جیل منتقل کیا گیا تھا بعد ازاں اسلام اباد ہائی کورٹ نے ان کی سزا معطل کر دی تھی تاہم 19 اگست کو انہیں سائفر گمشدگی کیس میں گرفتار کر لیا گیا اور اس طرح ان کی رہائی ناممکن ہو گئی۔
گزشتہ روز اٹک جیل میں ہی سائفر کیس کی ان کیمرہ سماعت سماعت ہوئی جس کے لیے خصوصی انتظامات کیے گئے تھے تاہم عمران خان کے وکیل نے کھلی عدالت میں سماعت کے لیے درخواست دائر کر رکھی ہے۔

Imran Khan allowed to talk to his sons on phone, in London