جماعت اسلامی جڑانوالہ میں جلائے گئے گھروں کی تعمیر نو کرے گی

امیر جماعت نے جڑانوالہ واقعہ کو پاکستان کے تشخص کے خلاف سازش قرار دیا اور کہا کہ قرآن کریم کی بے حرمتی میں ملوث اور اس افسوس ناک واقعہ کے بعد اشتعال پھیلانے والے گروہ کا پتا لگا کر تمام کرداروں کو کیفردار تک پہنچایا جائے۔جڑانوالہ واقعہ کے تناظر میں ہونے والی ”امن کانفرنس“ میں سینٹر کامران مائیکل، بشپ ندیم کامران، سردار بشن سنگھ، ساجدپھاٹیا اور ہندو، عیسائی، سکھ اور دیگر مذاہب کے قائدین نے شرکت کی۔

اقلیتی رہنماؤں  کا کہنا تھا کہ جب بھی اقلیتوں کے خلاف کوئی افسوسناک واقعہ ہوا، امیر جماعت نے زخموں پر مرہم رکھا۔ تما م شرکاء نے جڑانوالہ میں قرآن کریم اور عیسائی عبادت گاہوں اور گھروں کو جلانے کے واقعات کی بھی پرزور مذمت کی اور شفاف تحقیقات کا مطالبہ کیا۔

امیر جماعت نے کہا کہ جڑانوالہ میں مجموعی طور پر 86گھر اور 19گرجا گھر جلائے گئے،  جڑانوالہ میں مسیحی خاندانوں کو کاروبار کے لیے بلاسود قرض دیں گے، ان کے بچوں کی کفالت اور تعلیم کا بندوبست کیا جائے گا۔ جماعت اسلامی جلائے جانے والے گرجا گھروں کی تعمیر میں بھی ہاتھ بٹائے گی۔