آداب پیوندکاری ۔۔۔۔۔ زیتون کہانی 1

بقول اپنے ایک ہم جماعت کے،جمیل الرحمٰن زور قلم کے ساتھ ساتھ زور "قلمکاری ” کے فن میں بھی یکتا ہیں، سو آج کل ان پر خطہ کوہسار میں زیتون کی کاشت، پیوندکاری اور قلمکاری کی دھن سوار ہے اور مختصر وقت میں رب کریم نے انہیں حیرت انگیز کامیابی سے ہمکنار کیا ہے،وہ اپنے آبائی علاقے یعنی بیروٹ سرکل بکوٹ سے باہر ہزارہ ڈویژن، مری اور گلیات سمیت مختلف علاقوں میں زیتون کی کاشت کا بیڑا اٹھائے ہوئے ہیں، قارئین کوہسار کیلئے وہ اس موضوع پر اپنے تجربات بیان کریں گے جنہیں ہم "زیتون کہانی” کے عنوان سے شائع کر رہے ہیں۔

آج اس سلسلے کی پہلی قسط پیش خدمت ہے۔ آپ اس حوالے سے ذہن میں آنے والے سوالات کمنٹ باکس میں کر سکتے ہیں، جس کا تسلی بخش جواب دیا جائے گا، (ادارتی ٹیم)

اگرچہ میر نے ،، لے سانس بھی آہستہ کہ نازک ہے بہت کام ،، کارخانہ دنیا کے بارے میں کہا ہے لیکن اس کارگہ کا ایک کل پرزہ ہونے کے ناطے پیوندکاری کاری پر بھی اس کا اطلاق ہوتا ہے۔

،، نازکی ،، اس  ،کام، کی ایک مثال سے واضح ہوتی ہے کہ جہاں پچھلے سیزن میں کی گئی   پیوندکاری کا مثبت نتیجہ کہیں سے نوے فیصد آ  رہا تھا کہیں سے  اسی فیصد ۔

وہیں ایک علاقے سے یہ نتیجہ موصول ہوا کہ سو میں سے صرف دس قلمیں پھوٹنے میں کامیاب ہوئی ہیں ۔ یہ ہمارے لیے تعجب انگیز خبر تھی ۔ یہ درست ہے اچھی طرح پیوند کرنے کے بعد بھی قلم پھوٹنے میں بظاہر  کئی عوامل اور درحقیقت  اذن باری تعالیٰ کی محتاج ہوتی ہے ،،فرمان قدسی ہے ،،  افرایتم ما تحرثون ۔۔۔ أ انتم تزرعون ام نحن الزارعون ،، بھلا دیکھو تو تم بیج بوتے ہو اسے تم خود اگا لیتے ہو یا ہم اسے اگاتے ہیں ،،۔

جب بیج کا یہ معاملہ ہے تو قلم پر بدرجہ اولی اس کا اطلاق ہوتا ہے کہ یہ اس سے زیادہ مشکل کام ہے ۔

بہرحال خراب نتیجے کی خبر سن کر ہمیں بہت افسوس بھی ہوا لیکن آخر کار دو دن پہلے  ہمارے بزرگ پیوندکار  علی افسر صاحب  اس علاقے میں گئے تو انھوں نے ناکام قلموں کے معائنے کے ساتھ ساتھ ان کے نگران صاحب سے تفتیش بھی کی ۔ پتا چلا کہ موصوف نے ایک ہی دن ،بغیر اس تمیز کے کون سی قلم پھوٹی ہے اور کون سی نہیں اور معروف فطری اصول ،،تدریج ،، کی خلاف  ورزی کرتے ہوئے تمام قلموں کے شاپروں کی قبا  یکلخت چاک کر دی  ۔ اس کا نتیجہ یہ نکلا کہ قلم نہیں پھوٹے ۔مگر بہت تھوڑے۔

یہ تو سابقہ بپتا تھی جو کہہ ڈالی

اب ،، بی زیتون ،، کی نقاب کشائی کے چند  آداب جان لیں ۔

جب قلم پھوٹ جائے اور اس کی پھوٹ واضح ہو چکے یعنی  پتیاں پوری نکل آئیں تو اوپر چڑھائے گئے شاپر میں دو تین سوراخ کر دینے چاہئیں جو انگلی کے برابر ہوں ۔ ایک سوراخ شاپر کی نچلی طرف یعنی  قلم شدہ تنے کے نزدیک کرنا چاہیے تاکہ شاپر میں جمع شدہ پانی یہاں سے خارج ہو سکے اور جمع ہو کر فنگس کا باعث نہ بنے ۔ بہتر ہے کہ یہ شگاف زنی بوقت عصر کی جائے تاکہ نوزائیدہ کونپلوں کو یکدم تیز دھوپ کا سامنا نہ کرنا پڑے ۔

دو تین روز بعد جب کہ شاپر میں جمع شدہ بخارات بتدریج خارج ہو جائیں اور کونپلیں خارج کے موسم سے سازگاری اختیار کر لیں تو شاپر کو قینچی یا کسی تیز دھار ے آلے سے دو حصوں میں تقسیم کر کے ایسے الٹ کر نیچے کر دیا جائے جیسے بکری کی چمڑی  کھینچتے ہیں ۔

کہو کے تنے اور اور لگائی گئی قلموں کے جوڑ پر بندھا شاپر کبھی نہیں کھولنا ۔یہ پٹیاں تقریبا ایک سال بعد گل سڑ کر گر جائیں گی، اس وقت شاپر کو کھول کر آپریشن والی جگہ کو شاپر سے بالکل آزاد کرائیں  اور کسی کپڑے کی پٹی سے مضبوط باندھ دیں تاکہ ہوا کے جھونکوں سے جوڑ ہل نہ جائے ۔

والسلام

جمیل الرحمٰن عباسی