گریس کی "گریس” ۔۔۔۔۔۔۔۔۔۔ شیما باشا

یہ گریس تھی۔ امی سے بات کرنے کے دوسرے ہی دن گریس سے سارا گھر سنبھال لیا۔ وہاں سے میں نے اپنے کام سے محبت سیکھی۔ وہ اکیلے گھر میں بھی، جب اپنا کام کرتی تو پھر کھڑے ہوکے کسی آرٹسٹ کی طرح، تنقیدی نظر سے کمرے کو اسکے ایک ایک کونے کو دیکھتی، ایسے میں ہم میں سے کوئ اس گیلے فرش پر آجاتا تو اسکی ستوان کھنچی ناک پر، ایک شکن آجاتی،
پچھے ہٹ جاو
پراں ہو جئو،
کبھی کبھی جب امی نہ ہوتیں تو میں اسے تگنی کا ناچ نچا دیتی، مجھے اسکے منہ سے پراں ہٹ بہت اچھا لگتا۔ کبھی کبھی وہ رک رک کے ٹھہر کے کام کرتی اور کچھ دنوں کے لئے غائب ہوجاتی۔پھر ساتھ میں اک چھوٹی سی پٹلیا لاتی، اوف فوہ، ایک دفعہ میں نے اسکا کپڑا کھینچ کے دیکھا، اندر ایک چھوٹا سا انسانی بچہ کسمسایا، مجھے اسکی امید نہ تھی۔ میں نے اس سے پہلے پرندوں کے بچے ہی دیکھے تھے۔چیخ مار کے بھاگی۔
سب خوب ہنسے۔ گریس کو بیٹی کا بہت شوق تھا۔ آٹھویں بیٹے کی پیدائش پر وہ واپس آئ تو امی کے پاس بیٹھ کے باقاعدہ روئی۔ اس کی کھنچی ہوئ آنکھوں سے چمکیلے آنسو ، میرے ننھے سے دل کو بےچین کرگئے۔ اور کچھ تو سمجھ آیا نہیں۔مگر جب وہ کام کرنے لگی تو میں بھی اسکے ساتھ بڑھ بڑھ کے کام کروانے لگی۔ تس پہ وہ دوبارہ پودینے کی کیاری کے پاس بیٹھ کر رونے لگی۔ گھر میں اک عجب سوگوار صبح پھیل رہی تھی۔ امی اسے تسلیاں دے رہیں تھیں, چپ ہونے کو کہہ رہی تھیں ۔

دفعتا وہ کھڑی ہوئی اور اس نے امی سے سوال کیا۔ فیر میں اسے لے لیواں؟
امی نے بڑے، بڑے پن سے کہا ہاں ہاں گریس، اور یوں مجھے اپنی دوسری ماں مفت میں مل گئ۔ یہ زمانہ، تین چار سالوں پر محیط رہا۔گریس ماں کی نرم دلی، محبت اور نیکی بھرے وجود نے میری شخصیت سازی میں ایک اہم کردار ادا کیا۔ اس سارے زمانے میں ہم کرسمس پہ اسکے گھر جاتے، اور وہ عیدوں پہ ہمارے گھر آتی۔ پھر کسی سال یہ سلسلہ ٹوٹا ہوگا۔ پھر کبھی کبھار ملنا ، پھر بالکل ہی گمشدگی۔
کل میں نے حیدر علی کو جوابا کمنٹ میں لکھا تھا۔ ہاں مگر بچھڑے ہووں سے ہماری امید نہیں ٹوٹتی۔ ہم یہ ہی سمجھتے ہیں وہ اپنے اسی روپ میں ہمیں کسی رستے، کسی موڑ پر مل جائیں گے۔
مگر رات سے مجھے ایک ہی خیال آرہا ہے کہ اب اگر ہم کبھی ملے تو،بھلا میں اس سے کیسے نظر چار کرونگی؟ کیسے اپنے مجرمانہ، خون آلود تخریب کار ہاتھوں سے اس پاکیزہ بدن کو چھو پاوں گی؟
اگر اسکے قدموں سے لپٹنے کی کوشش بھی کروں گی تو کہیں وہ اپنے قدم ہی نہ کھینچ لے۔
میرے دل پہ ایک نفرت آلود خاموشی چھائی ہوئی ہے۔
خداوند مجھے اب کبھی گریس ماں کے پاکیزہ وجود سے نہ ملائے۔
الہی آمنین۔
سترہ اگست دو ہزار تئیس کی ایک دل گرفتہ دوپہر۔