تجاوزات کیخلاف آپریشن پراحتجاج،مری جام۔ سیاح پھنس گئے

واضح رہے کہ عدالتی حکم کے تحت وزیر اعلٰی پنجاب کی ہدایت پر جھیکا گلی روڈ  مری کے گردو نواح میں مبنہ غیر قانونی تعمیرات کے خلاف انتظامیہ نے ایک بار پھر  آپریشن شروع کیا ہے ،آپریشن ایڈیشنل ڈپٹی کمشنر کی نگرانی میں کیا جا رہا ہے۔جس پر متاثرین اور مقامی لوگوں کا احتجاج جاری ہے جس کی وجہ سے جھیکاگلی سےجانے والی تمام سڑکیں بند ہو گئیں۔ جھیکا گلی چوک سے چاروں طرف جانے والی سڑکوں پر گاڑیوں کی طویل قطاریں لگ گئیں۔

اینٹی انکروچمنٹ آپریشن کے متاثرین نے کارروائی شروع ہوتے ہی جھیکا گلی بازار میں رکاوٹیں کھڑی کرکے ٹریفک جام کر دی اور آپریشن کے خلاف شدید احتجاج کیا، جس کے نتیجے میں کلڈنہ جھیکا گلی روڈ۔جھیکا گلی مال روڈ،جھیکا گلی سے ایکسپریس وے روڈ،آر کے ایم روڈ مکمل بلاک ہوگیا تمام اطراف میں گاڑیوں کی طویل لائنیں لگ گئیں جس کے باعث بڑی تعداد میں سیاح فیملیاں اور تعلیمی اداروں سے واپس گھروں کو جاے والے طلباء وطالبات بھی ٹریفک میں پھنس کر رہ گئے

ٹریفک جام میں پھنسے اسکول کے بچے اور موٹرسائیکل سوار بے بسی کی تصویر بنے ہوئے ہیں

اس دوران کئی مریض بھی گھنٹوں تک ایمبولینسوں میں پھنسے رہے۔مری راولپنڈی، جی ٹی روڈ، بھوربن اور پتریاٹہ روڈ سمیت تمام سڑکیں بند ہو گئیں۔لارنس کالج بائی پاس روڈ پر بھی گاڑیوں کی لمبی قطاریں لگ گئیں۔

دوسری طرف  سکول کے بچوں کی متعدد  وینز ٹریفک جام میں پھنس گئیں۔ گھر سے صرف ناشتہ کر کے جانے والے چھوٹے بچے  بھوک سے تڑپتے رہے  جبکہ  والدین گھروں پر پریشان ہوتے رہے۔

والدین نے فوری سکول وین کا راستہ کھولنے کا مطالبہ کرتے ہوئے کہا کہ تجاوزات کی اجازت ٹی ایم اے اور دیگر سرکاری حکام مٹھی گرم کر کے دیتے ہیں اور اب انہی تجاوزات کیخلاف کارروائی کے نام پر شہریوں کو تنگ کیا جا رہا ہے، اس میں والدین کا کیا قصور ہے؟

آپریشن پر اب تک کی پیش رفت کیا ہے؟ انتظامیہ کیا کہتی ہے؟

ہائی کورٹ کے حکم پر مری میں غیر قانونی تعمیرات اور تجاوزات کیخلاف آپریشن کا آغاز منگل کے روز کیا گیا ، اس دوران اپر جھیکا گلی روڈ اور ویو فورتھ روڈ پر بعض عمارتوں کے کچھ حصے گرا دئیے گئے۔

آپریشن کی نگرانی ایڈیشنل ڈپٹی کمشنر مری کیپٹن (ر) قاسم اعجاز کر رہے تھے۔ اس موقع پر پولیس کی بھاری نفری موجود تھی۔

اے ڈی سی آر مری کا کہنا تھا کہ مری کی حدود میں 400 کے قریب ایسی عمارتیں تعمیر کی گئی ہیں جن کے نقشے منظور نہیں ہوئے ان کے مالکان کو بار بار نوٹس بھیجے گئے۔ بعض کے خلاف مقدمات بھی قائم کئے لیکن ان لوگوں نے غیر قانونی تعمیرات کا سلسلہ جاری رکھا، اب ہمیں ہائی کورٹ کی طرف سے حکم ملا ہے کہ ایسی تعمیرات اور غیر قانونی تجاوزات کیخلا ف آپریشن کرکے ان کو ختم کیا جائے۔

غیر قانونی تعمیرات کے وقت ادارے کہاں تھے؟ عوامی حلقوں کا سوال

دوسری طرف عوامی حلقوں کا کہنا تھا کہ مری میں تعمیر ہونے والی  مذکورہ غیر قانونی تعمیرات چند دنوں یامہینوں میں تعمیر نہیں ہوئیں ، سوال یہ ہے کہ جب یہ بلڈنگیں تعمیرہو رہی تھی تو اس وقت انتظامیہ اورذمہ داران کہاں تھے؟ مٹھی گرم کر کے تعمیرات کرائی گئیں اور اب گرانے کی باتیں کی جارہی ہیں ۔

بعض متاثرین نے ایف آئی اے اور نیب سے یہاں تعینات رہنے والے سابق افسران اور بلڈنگ انسپکٹروں کے اثاثے چیک کرنے کا مطالبہ کیا اور کہاکہ ان کے پاس کروڑوں کے اثاثے کہا سے آئے؟ مہنگی گاڑیاں ، شاہانہ طرز زندگی یہ کیسے گزار رہے ہیں یہ سب دولت غیر قانونی تعمیرات کی مد میں بنایا گئی ہے ۔انہوں نے مطالبہ کیا کہ ان سب کیخلاف تحقیقات کرکے پہلے اوراب ملوث لوگوں کوقرارواقعی سزا دی جائے اور ان کے اثاثے ضبط کرکے بھاری جرمانہ لیا جائے۔