نگران وزیراعظم کی حلف برداری۔کابینہ میں کون کون شامل ہو گا؟

ایوان صدر میں منعقدہ پروقار تقریب میں صدر مملکت ڈاکٹر عارف علوی نے نگراں وزیراعظم سے حلف لیا۔اس موقع پر سابق وزیراعظم شہباز شریف کے علاوہ کچھ وفاقی وزراء بھی تقریب میں شریک تھے۔

ذرائع کا کہنا ہے کہ نگراں وزیراعظم کی تعیناتی اور حلف برداری کا عمل مکمل ہوتے ہی اب نگراں کابینہ کی تشکیل کے لیے تیاریاں شروع کر دی گئی ہیں جس کے لیے پہلے ہی کافی ہوم ورک مکمل کیا جا چکا ہے۔
ذرا ئع کا دعوی ہے کہ قبل ازیں وزیراعظم کی دوڑ میں شریک سابق وفاقی وزیر خزانہ عبدالحفیظ شیخ نگراں کابینہ میں بھی وزیرخزانہ کا قلمدان سنبھالیں گے۔

اسی طرح وزیراعظم کی دوڑ میں شامل ایک اور نام جلیل عباس جیلانی کو نگراں وزیر خارجہ مقرر کیا جا سکتا ہے جو سفارت اور بیوروکریسی کا طویل تجربہ رکھتے ہیں۔
ذرائع کا کہنا ہے کہ نگران وزیر داخلہ کے لیے سابق آئی جی اور کرمنالوجی کے ماہر ڈاکٹر شعیب سڈل کو فیورٹ بتایا جا رہا ہے۔اسی طرح نگران وزیر قانون کے لیے معروف قانون دان احسن بھون کا نام لیا جا رہا ہے جبکہ وزارت صنعت کے لیے ایپٹما کے چیئرمین گوہر اعجاز فیورٹ قرار دیے جا رہے ہیں۔

اسی طرح سابق نیک نام پولیس آفیسر ذوالفقار چیمہ بھی کابینہ کا حصہ بن سکتے ہیں جبکہ سابق صوبائی وزیر داخلہ سرفراز بگٹی بھی نگراں کابینہ کا حصہ ہوں گے۔