آٹےکےتھیلے میں چیتے کا بچہ۔ محکمہ وائلڈ لائف کب سدھرے گا؟

گلیات میں واقع ایبٹ آباد کی بالائی یونین کونسل تاجوال میں گزشتہ کئی روز سے دہشت  پھیلاتے جنگلی چیتوں کے خاندان کا ایک بچّہ گذشتہ روز وائلڈ لائف کی حراست میں آگیا ۔۔۔

صبح اسکول جاتے ہوئے معصوم بچّوں سفیان ایّان اور دیگر نےجن کی عمریں آٹھ سے بارہ سال کے درمیان تھیں ، تاجوال کے محلّہ کٹلہ اور کلس کے قریب روڈ پر گشت کرتے جنگلی چیتوں کے اس خاندان کو دیکھا تو چیختے چلاتے واپس بھاگے اور گھر پر بتایا جس پر معزّزین علاقہ سردار فرید اور دیگر نے محکمہ وائلڈ لائف کو اطلاع دی

خانسپور سے فوری طور پر وائلڈ لائف کی ٹیم روانہ ھوئی اور ایک گھنٹے کے اندر وائلڈ لائف آفیسر غلام احمد عباسی اپنے دو اہلکاروں کے ساتھ موقع پر پہنچے تو بڑی مادہ چیتا اور دیگر بچّے سائٹ چھوڑ چکے تھے تاہم ایک چھوٹی مادہ چیتا جس کی عمر تقریباً تین ماہ بتائی گئی بھوک سے نڈھال موجود پائی گئی جسے باآسانی تحویل میں لے لیا گیا ۔۔۔

یہ امر قابل ذکر ہے کہ وائلڈ لائف آفیسر اور ان کا معاون عملہ بغیر کسی ڈیپارٹمنٹل ایکوئپمنٹ اور ہنٹنگ ، کیرج وہیکل کے موٹر سائیکل پر آیا اور مقامی لوگوں سے رسّی مانگ کر اس چیتے کے بچّے کو باندھا اور آٹے کے بیس کلو کے ایک خالی بیگ میں ڈال کر موٹر سائیکل پر ہی روانہ ھوگئے ۔۔۔

محکمہ سے لی گئی تفصیلات کے مطابق یہ چھوٹا مادہ چیتا ایبٹ آباد میں سرکاری ویٹرنیری ڈاکٹر کے پاس لے جایا جارہا ھے جہاں طبی معائنے کے بعد اسےاپنے مقامی چڑیا گھر منتقل کر دیا جائے گا۔

آٹے کے تھیلے میں چیتے کا بچہ

آٹے کے اس تھیلے میں کچھ اور نہیں بلکہ ایک زندہ سلامت ننھا چیتا ہے اور موٹر سائیکل سوار افراد محکمہ وائلڈ لائف ایبٹ آباد کے اہلکار ہیں جو چھانگلہ گلی تاجوال سے اس چیتے کو ریسکیو کر کے لے جارہے ہیں ۔
چند سیکنڈ کی اِس ویڈیو میں محکمہ وائلڈ لائف KPK کی کسمپرسی اور بدحالی واضح ہورہی ھے کہ کیا خطرناک جنگلی جانوروں بالخصوص چیتے کو ریسکیو کرنے کے لیئے محکمہ اپنے اہلکاروں کو بناء کسی گاڑی ، پنجرے ، جال ، اور بےہوش کرنے والی گَن کے خالی ہاتھ بھیج دیتا ھے کہ شیر اور چیتے کے ساتھ کُشتی کر کے قابو کرنا ھے ؟

واضح رہے کہ چیتے کو چارپائی میں استعمال ہونے والی پلاسٹک نوار کے ساتھ گلے سے باندھا گیا جیسے کتّا یا بکرا باندھا جاتا ھے اور تھیلے میں چیتا ڈال کر موٹرسائیکل پر بیٹھ کر لے جانا دنیا کی نظروں میں جہاں ایک مذاق بن کر رہ گیا وہیں بین الاقوامی محکمہ وائلڈ لائف پاکستان کے لیئے یہ بہت بڑا سوالیہ نشان بھی ہے ۔۔۔
مزکورہ اہلکاروں کی فرض شناسی اور بہادری قابل ستائش ھے لیکن ملازمین کو اس طرح بے سروسامان چیتا پکڑنے کے لیئے بھیج دینا ان کی زندگی سے کھیلنے کے مترادف ہے ۔۔۔

دلچسپ بات یہ ہے کہ خطرناک جانوروں کو پکڑنے یا ریسکیو کرنے کا سامان وائلڈ لائف ایبٹ آباد کے سینٹرل اربن ایریا میں ہے جو گلیات میں چیتوں کے اس مسکن سے چار گھنٹے آنے جانے کی مسافت پر واقع ہے ،اب بظاہر یہی منطق سمجھ آتی ھے کہ گاؤں کے لوگ چیتوں کو باتوں میں لگا کر رکھیں جب تک کہ وائلڈ لائف کے اہلکار مکمل تیاری کر کے جائے وقوعہ پر پہنچ سکیں ۔

زندہ چیتا پکڑنے کے حوالے سے تاجوال کے مقامی افراد کا تعاون اور قانون پسندی انتہائی قابل تعریف ھے اور یہ بڑی زبردست مثال قائم کی گئی کہ مقامی لوگوں کی طرف سے چیتے کو زرا بھی نقصان نہیں پہنچایا گیا ۔
آخری اطلاعات کے مطابق اندھیرا شروع ہوتے ہی چیتے کی چنگھاڑ اُسی علاقے میں مسلسل سنی جارہی ھے جو یقیناً اُس مادہ چیتے کی ھوسکتی ھے جو اپنے بچّے کی تلاش میں ھو ۔۔۔

گلیات کے گھنے جنگلات نایاب جنگلی جانوروں کی محفوظ پناہ گاہ ہیں لیکن ان چیتوں کے کھانے کے لیئے کوئی دوسرا جانور سردست ان جنگلوں میں موجود نہیں اور اس سنجیدہ مسئلے کے حل کے لیئے محکمہ وائلڈ لائف کو فوری طور پر اقدامات کرنے چاہیئیں ،خوراک کی عدم دستیابی کی وجہ سے یہ چیتے اب آبادیوں کا رُخ کررہے ہیں اور اس طرح مقامی لوگوں اور ان کے پالتو جانوروں کی زندگی کو شدید خطرات لاحق ہیں ۔

محکمہ وائلڈ لائف کے پی کے کو جنگلی حیات کے تحفّظ کے لیئے مزید بہتر ، فعّال اور جدید تقاضوں سے ہم آہنگ کرنے کی اشد ضرورت ہے کیونکہ خطرناک جنگلی جانوروں کی وجہ سے انسانی آبادیاں اور ان کے پالتو جانور آئے روز نقصانات کا شکار ہورھے ھیں ۔