پہاڑی افسانچے

بڑے بڑے ڈَاکٹراں دنیا نے ماڑے مُلخاں ناں معائنہ کرنا شروع کیتا۔ ملخاں نی لَمیاں قطاراں وِچ سب تھیں بیمار تَح لاغر مُلخ پاکستان ایسا۔ ڈاکٹر مکمل معائنہ کری تَح پریشان ہوئی غے۔ انھاں کی سمجھ نسی اشنی جے اس بیمارے نی خوراک وی چَنگی، اس کول وسائل وی بَہوں زیادے اے تَح اس کی کوئی معذوری وی نیئی پر اس نے باوجود یوء بیمار تَہ لاغر کیاں آ؟

بڑے بڑے سپیشلسٹ بلائے غے۔ مریضے نی بیماری پوڑے تائیں ٹیسٹ کیتے غے۔ رپوٹاں دکھی تَح ڈاکٹر حیران پریشان ہوئی غے۔ پاکستان نے جُثّے اُپّر بڑیاں بڑیاں جلماں چَمڑیاں ہوئیاں سیاں۔ جِہڑیاں اس ناں خُون پی پی تَہ کُپّے بنی غیاں اسیاں۔

ڈاکٹراں مریض نی جان بچانے واستے مشورہ دتا،

"انھاں جلماں کی پاکستان نیں جثے را چھکی چھکی تح لوائی سٹو۔ پاکستان چنگا پہلا ہوئی غیسی آ۔”

لوک یاء گل سنی تح ہور زیادے پریشان ہوئی غے۔ انھاں بے وسی نال سوچیا۔۔۔

افسوس۔۔۔انھاں جلماں سی پاکستان نے جثے کی کون نجات دوائی سکناں۔ ایہے تح پاکستان نیاں مالک تح حاکم یاں۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سیاست دان

شاہد بی اے کَری تے گرائیں نَیں لوکاں تائیں ہِک بلَڈ بنک قَیم کیتا۔ کسے کی خُون نی لَوڑ وَیہہ تے شاہد ناں قَیم کِیتا بلَڈ بنک فورن خُون مُہَیّا کرناں سا۔

وقت نَیں نال نال شاہد بَدلی غا۔ اُس بلَڈ بنک بَند کری شوڑیا تے نالے لوکاں نال میل ملاپ وی ختم کری شوڑیا ایس۔ پَہلیاں اوہ ہر گَلّے چ سَچّ بولنا سا تے ہُن گَلّے گَلّے وچ چُہوٹھ اُس نی عادت بنی غی۔۔ پَہلیاں بَہوّں اخلاق نال گَل کَرنا اَیسا، ہُن سِدّھے مُنہ گَل ناء کَرنا۔ بَلکن ماؤُ پَہینوں نِیاں گالِیں دیناں تے بدتمیزیاں کَرناں۔ پَلہیاں ”تُس“ ، ”جناب“ تے ہُن ” تُو“، ”تڑاک“۔

اُس سَنگیاں ساتھیاں نال بیہناں اُٹھناں وِی چھوڑ دِتّا۔ بَلکن ساریاں سی دُورا دُورا لَنگھناں شروع کَری شوڑیا ایس۔

سَنگی اُس نَیں اِس روَیّے اُپّر پریشان ہوئی غے۔ اُس کی زبَردَستی ماہرِ نَفسیات کول کِنّی غے۔

بَہوّں تَفصِیل نال کئی کہنٹے معائنہ وَہا۔ ڈاکٹر صاب ساریاں سَنگیاں کی مارکھ دِتّی۔

”مبارخ، مبارخ !“ تُساں ناں سَنگی سیاست دان بَننے ناں اہل ہوئی چُکیا۔ تُس ہُن اِس ناں پِچھّا چھوڑ دِیو۔

۔۔۔۔۔۔۔۔۔۔۔۔ محبت حسین اعوان، بیروٹ، ہزارہ