جج کی بیوی کو اسلام آبادکی عدالت سے بھی ضمانت مل گئی

اسلام آباد کی سیشن عدالت نے بھی ملازمہ رضوانہ تشدد کیس کی مرکزی ملزمہ اور جج کی بیوی  سومیہ عاصم کی ایک لاکھ روپے کے مچلکوں کے عوض 7 اگست تک عبوری ضمانت منظور کرلی۔

منگل کو  ملزمہ نے ضمانت قبل از گرفتاری کیلئے ڈسٹرکٹ اینڈ سیشن کورٹ اسلام آباد سے رجوع کیا۔درخواست میں کہا گیا کہ سومیہ نے کبھی رضوانہ کو تشدد کا نشانہ نہیں بنایا، عدالت ملزمہ کی ضمانت قبل از گرفتاری کی درخواست منظور کرے۔درخواست میں مؤقف اپنایا گیا کہ درخواست گزار پڑھی لکھی ہیں اور سول جج کی اہلیہ ہیں۔ یہ بات درست ہے کہ رضوانہ اپنے والدین کی مرضی سے ان کے یہاں کام کرتی تھی لیکن اس کے علاوہ ایف آئی آر میں جو کچھ درج ہے وہ جھوٹ ہے۔

درخواست میں کہا گیا ہے کہ رضوانہ کی عمر 17 برس ہے اور سومیہ نے ہمیشہ اس کے ساتھ نرمی کا سلوک کیا اور رضوانہ سے اسی طرح کا برتاؤ کیا جو وہ اپنے 7 سے 12 برس کے تین بچوں کے ساتھ کرتی تھیں۔یاد رہے کہ لاہور ہائیکورٹ نے ملزمہ کی یکم اگست تک حفاظتی ضمانت منظور کی تھی۔