افسانہ ” ترقی”۔۔۔۔۔۔۔۔۔۔راشدعباسی

تحریر :  راشدعباسی

اسرار ہمیشاں بہوں ہلس محبت نال ملناں ایسا۔ اس ناں تعلق وی ہک گرائیں نال ایسا تے اپنی زبان تے ثقافت نال اوہ وی ہلس رکھنا سا۔ چنگی گل یاء سی جے اس کی کوئی احساس کمتری نیسا تے اوہ پہاڑی وچ گل بات کرنیاں چہکناں نیسا۔ ورنہ کوہسار نے عام لوک اس سازش ناں شکار ہوئی گئے سے جے مادری زباناں بولنے والے تے اپنی ثقافت نال جڑے رہنے والے لوک پینڈو ہونے۔ پڑھے لخے لوک اوہ ہونے جیہڑے فر فر انگریزی بولن۔

میں سعودی عرب ، لیبیا، قطر، عمان تے دوبئی کافی عرصہ کم نے سلسلے وچ رہیاں تے اس دوران اس نال رابطہ نآء رہیا۔ سنگیاں کولا پتہ لگناں رہیا جے اوہ وی دوبئی رہیا تے مڑی اچھی تے کسے بڑے سیاست دان نال وی بہناں اٹھنا شروع کری شوڑیا ایس۔

کوئی دس سال بعد ہک بیاہ اپر اس نال ملاقات ہوئی گئی۔ لگناں سا اس نے ہتھ الہ دین ناں چراغ لگی گا۔ اوہ مالی طور اپر بہوں آسودہ ہوئی گا سا۔ اس دسیا جے اوہ کمرشل پلاٹ، پوش ایریے وچ کوٹھیاں تے پلازیاں ناں مالک آ۔

اشرافیہ وچ شامل ہوئی تے اس نے کہرے آلی پہلا کم یوء کیتا جے کہر وچ ساریاں اپر پابندی لائی شوڑی ایس جے سب انگریزی یا اردو وچ گل بات کرسن۔ جیہڑا وی پہاڑی بولسی اس ناں جیب خرچ بند ہوئی گیسی۔ خصوصا نکیاں کی اپنی زباناں کولا اسرے بچانا جسرے کرونے کولا بچنے واستے حفاظتی تدبیراں ناں خیال رکھیا گشناں۔ کدے انھاں اپنی ماء بولی کولا جان نانہہ چھڑائی تے اوہ پینڈو یے رہسن۔ تے اج نیں دور وچ انگریزی تے ترقی لازم و ملزوم یاں۔

دماغاں والے لوک دسنے جے زبان ثقافت ناں ہتھیار آ۔ جسلے کوئی قوم اپنی ماء بولی چھوڑ دے تے وہاء اپنی لوک رہتل کولا وی دور ہوئی گشنی۔

اس کی غیراں نی زبان تے ثقافت اچی تے اپنی ماء بولی تے لوک رہتل کہٹیا لگن لگی پینی۔

تھوڑے عرصے وچ انھاں نے بچے اپنیاں روائتاں تے قدراں کولا نوری سال نی دوری اپر چلے گئے۔ ہن انھاں نے کہر نیاں کڑیاں بڑے بڈیارے نال ملنے جلنے والیاں کی دسنیاں سیاں جے انھاں نے نکے ہن بہوں ماڈرن ہوئی گے۔ انھاں کی پہاڑی زبان تے سمجھ یے نیئی اشنی۔

اے لیول کرنے سی بعد نکیاں نکے باہر پڑھنے کی چلے گئے۔ نویں ماحول وچ اوہ اپنی ثقافت تے رہن سہن بلکل یے پہلی گئے۔ ہن اوہ پاکستان اچھی تے امریکن ایکسنٹ وچ جسلے انگریزی بولنے سے تے اسرے لگناں سا کوئی امریکی بولنا آ۔ کڑیاں ہن سارے لوکاں کی بہوں بڈیار نال دسنیاں سیاں جے انھاں نے نکے انگریزی بولنے تے اسرے لگناں جیئاں سی این این اپر خبراں لگیاں یاں ہون۔

گرمی بہوں زیادے ہوئی گئی تے اسرار ہوراں کی چھٹیاں اپر پاکستان آئے ہوئے نکیاں گراں جلنے نی ضد کیتی۔ گراں انھاں نے کوٹھے نوکر ہر مہینے گچھی صاف کری اشنے سے۔ اس واری تے خصوصی صفائی تھی علاوے بسترے تے کمبلاں وی اسرار ہوراں نویاں پہیجیاں سیاں۔

گراں ناں موسم بہوں سوہناں سا۔ بوٹیاں نال پھل فروٹ لگا وہا سا۔ ساون نے مہینے وچ کوہسار وچ بدل وی تقریبا روز ہونا آ۔ امریکہ جیئے ملخے وچ رہنے والے نکیاں کی وی گراں تے موسم بہوں چنگے لگے۔

اسرار ہوراں نے سکے ماسی "جنتے” ہوراں کی انھاں نے گراں اشنے نی اطلاع لبھی تے اوہ بوہلی، ناخ تے اپنے ڈوغے نیاں ککڑیاں کہنی تے اسرار ہوراں کی ملنے ای آئے۔ انھاں نکیاں نال وی ملنے نی کوشش کیتی پر نکے دور نسی گئے۔ اسرار ہوراں انگریزی وچ نکیاں کی سمجھایا جے ماسی جنتے ہوراں انھاں کی چائی چائی تے پالیا سا۔ اوہ انھاں نے سکے ماسی اے۔ انج وی گراں نیں عام لوک وی ہک کہرے نے بندیاں نی طرحے ہلس، ہمدردی تے ایکے نال گراں وچ رہنے۔ انھاں پہچھی تے لیتری نے بارے وچ وی نکیاں کی دسیا۔ انھاں کی یقین سا جے بچے اصل گل سمجھی تے ماسی جنتے ہوراں کی معذرت وی کرسن تے گلے وی لگسن۔ پر اسرار ہوراں نے چپ ہونے اپر نکیاں آخیا۔۔۔۔

 بڈھی نالا بو اشنی، اساں اس کی نیئاں ملنے۔

 The old lady has bad odor we won’t hug her

(بڑھیا سے پسینے کی بدبو آ رہی ہے، ہم اس سے گلے نہیں ملیں گے)