قربانی کے جانوروں کے انتظامی معاملات بہتر بنانے کی ضرورت ہے

حال آنکہ قربانی کے خلاف غیر مسلموں کے پروپیگنڈے کے ساتھ ساتھ کئی مسلمان دانش ور بھی میڈیا کے ذریعے قربانی پر جانور ذبح کرنے کے بجائے اس سرمائے سے جامعات اور ہسپتال بنانے کی بات کرتے ہیں۔

لیکن علمائے کرام لوگوں کو سنت ابراہیمی کی اہمیت سے روشناس رکھنے میں کامیاب رہے ہیں۔

انتظامی حوالوں سے بات کی جائے تو آج تک نہ انتظامیہ، نہ علمائے کرام اور نہ ہی تعلیم یافتہ طبقے نے قربانی کے جانوروں کو ایک دو دن منظم طریقے سے رکھنے کا کوئی طریقہ وضع کرنے کی متفقہ و مشترکہ سعی و کوشش کی ہے۔

کئی لوگ ہفتوں پہلے قربانی کا جانور لا کر اپنے گھر کے سامنے باندھ دیتے ہیں۔ یوں گلی سے گزرنے والی ٹریفک کے لیے مسئلہ پیدا ہو جاتا ہے۔

پھر گلی میں گندگی اور تعفن کا مسئلہ ہوتا ہے۔ قربانی کے بعد شہری صفائی کے عملے کی ہدایات کے برخلاف آلائشیں جا بہ جا پھینک دیتے ہیں۔

یوں آلائشیں، گوبر، اور پھینکا گیا گوشت وغیرہ کئی کئی روز تک سڑکوں پر پڑا رہنے کی وجہ سے گندگی و تعفن ہی نہیں پھیلتا

بلکہ یہ لاپرواہی متعدد بیماریوں کا بھی موجب بنتی ہے۔

اکثر جگہوں پر یہ بھی دیکھنے میں آیا ہے کہ جانوروں کی تعداد جب بہ تدریج بڑھنا شروع ہوتی ہے

تو پھر پیدل چلنے والوں کے لیے بھی کئی گلیوں سے گزرنا ناممکن ہو جاتا ہے۔ کئی جگہوں پر تو گلیاں بند کر دی جاتی ہیں۔

حال آنکہ اس ضمن میں مفتیان کرام کے واضح فتاوی موجود ہیں۔۔۔

"عمومی شاہراہ اور راہ گزر میں ایسا تصرف کرنا کہ گزرنے والوں کو تکلیف ہو یا گزرنے کا راستہ ہی نہ رہے، ایذائے مسلم ہونے کی وجہ سے حرام ہے

، لہذا قربانی کے جانور باندھنے کے لیے قناتیں لگا کر گزرنے والوں پر گلیاں بند کردینا یا راستہ تنگ کردینا جائز نہیں،  اس سے اجتناب کیا جائے۔ 

راستہ مکمل یا جزوی طور پر بندکیے بغیر گلی میں جانور باندھنا جائز ہے، بصورتِ دیگر متبادل جگہ کا انتظام کیا جائے۔” 

(دارالافتاء، بنوری ٹاؤن)

علمائے کرام، اہل علم و دانش اور انتظامیہ کو مل کر اس امر کو یقینی بنانا چاہیے

کہ ہر علاقے میں ایسی چھت کی حامل محفوظ جگہیں مختص ہوں

جہاں پر جانوروں کو بہ احتیاط و حفاظت رکھا جائے۔ ۔

نیز قربانی کے لیے بھی ہر گلی محلے کے بجائے قربان گاہیں بنائی جائیں۔

پہلے کچی جگہوں پر قربانی جاتی تھی اور خون کے رسنے کے لیے گڑھے بھی بنائے جاتے تھے۔

قربان گاہوں میں قربانی سے صفائی کے عملے کے لیے بھی آسانی ہو گی،

بیماریوں کی روک تھام ہو گی اور انتظامی مسائل بھی پیدا نہیں ہوں گے۔