صدر جیالا ہو گا ۔۔آصف زرداری نے نواز شریف سے بڑا مطالبہ کر دیا

ذرائع کا دعویٰ ہے کہ اسی حکمت عملی کے تحت پیپلزپارٹی نے مسلم لیگ نون سے مطالبہ کیا ہے کہ انہیں پنجاب میں کم از کم ایک درجن کے قریب نشستوں پر مدد فراہم کی جائے یعنی قومی اسمبلی کی مذکورہ نشستوں پر نواز لیگ اپنے امیدوار کھڑے نہ کرے۔ذرائع کے مطابق نواز لیگ نے ندیم افضل چن سمیت پی پی کے بعض امیدواروں کی حمایت کا یقین دلایا ہے۔ذرائع کے مطابق پیپلز پارٹی نے ن لیگ سے پنجاب سمیت دیگر صوبوں میں سیٹیں مانگ لی ہیں، گیلانی خاندان، راجہ رویز اشرف، قمر زمان کائرہ اور ندیم افضل چن سمیت کچھ دیگر حلقوں میں ن لیگ امیدوار کھڑے نہیں کرے گی۔
یہ امر قابل ذکر ہے کہ پیپلز پارٹی اپنے سیاسی مرکز سندھ میں مسلم لیگ نون سمیت کسی بھی اتحادی جماعت کو ذرا سی بھی گنجائش لینے کو تیار نہیں ہے ،جبکہ بطور اتحادی جماعت پنجاب میں وہ زیادہ سے زیادہ حصہ وصول کرنا چاہتی ہے ۔ ذرائع کے مطابق آصف زرداری کی پالیسی یہ ہے کہ وسطی اور شمالی پنجاب میں نواز لیگ کی حمایت سے کچھ نشستیں جیت لی جائیں جبکہ جنوبی پنجاب میں جہانگیرترین گروپ کے ساتھ اتحاد کر کے کچھ سیٹیں نکالی جاسکتی ہیں جہاں پہلے ہی پیپلز پارٹی کی پوزیشن قدرے بہتر ہے ۔

ذرائع کا بتانا ہے کہ وزیر اعظم شہباز شریف بھی لندن سے دبئی پہنچیں گے اور آئندہ ہونے والی ملاقاتوں میں شامل ہوں گے،  اس کے علاوہ دبئی میں ہونے والی ملاقات میں نگران وزیراعظم کا نام بھی فائنل کیا جائے گا جبکہ الیکشن کی تاریخ بھی اسی ملاقات کے دوران دونوں جماعتیں فائنل کریں گی اور امکان ہے کہ اسمبلی کی مدت پوری ہونے سے پہلے اسمبلی توڑنے کے معاملے پر بھی غور کیا جائے گا، اسمبلی وقت سے پہلے توڑنے سے سیاسی جماعتوں کو الیکشن مہم کے لیے وقت مل سکےگا۔

ادھر سابق وزیراعظم نواز شریف کی ابوظبی میں پاکستان کے سیاسی و معاشی حالات پر طویل بیٹھکیں جاری ہیں، مسلم لیگ ن کی چیف آرگنائزر مریم نواز سے سابق صدر آصف علی زرداری اور وزیر خارجہ بلاول بھٹو زرداری نے ملاقات کی۔

مریم نواز نے گزشتہ روز خصوصی میٹنگز پر پیپلزرٹی قیادت کو اعتماد میں لیا، پیپلز پارٹی اور لیگی قیادت کے درمیان آج رات بھی ملاقات کا امکان ہے۔