سانحہ نو مئی پر پاک فوج میں اعلٰی سطح پر بڑی تادیبی کارروائی

سانحہ 9 مئی کے پیچھے 3 سے 4 ماسٹر مائنڈز اور 10 سے 12 منصوبہ ساز تھے

ڈی جی آئی ایس پی آرنے بتایا کہ 9 مئی واقعات کا مقصد  پاک فوج کو اشتعال دلاکر فوری رد عمل پر مجبور کرنا تھا، تاکہ فوج شدید ردعمل دے اورملک میں انتشارپھیلے، تاہم فوج نے تحمل کا مظاہرہ کیا ۔فوری رد عمل نہ دےکرفوج نےگھناؤنی سازش کو ناکام بنایا۔

انہوں نے کہا کہ جب بھی کوئی نقصان ہوتا ہے فوج انکوائری کرتی ہے، جن افسران کی غفلت یا کوتائی ہوئی ان کو سزائیں دی گئیں،  فوج کے احتسابی عمل میں عہدےیامعاشرتی حیثیت کی کوئی تفریق نہیں رکھی جاتی، جتنا بڑا عہدہ ہوتا ہے، اتنی ہی بڑی ذمہ داری ہوتی ہے، تحقیقات سے ثابت ہوا سانحہ 9 مئی کی منصوبہ بندی کئی مہینوں سے چل رہی تھی۔ترجمان پاک فوج  نے انکشاف کیا کہ سانحہ 9 مئی کے شواہد سے واضح ہواکہ اس کے پیچھے 3 سے 4 ماسٹر مائنڈز اور 10 سے 12 منصوبہ ساز تھے۔

آج شہدا کے ورثا آرمی چیف سےسوال کررہے ہیں کیا وہ شہدا کی حرمت کا مستقبل میں تحفظ کرسکیں گے؟ اگر شہدا کے تقدس کی بےحرمتی ہونی ہے تو جان قربان کرنے کی کیا ضرورت ہے؟ انہوں نے واضح کیا کہ  افواج پاکستان  تمام اکائیوں، مکتبہ فکر، طبقات کی نمائندگی کرتی ہیں نہ کہ کسی مخصوص اشرافیہ کی۔

فوجی عدالتوں میں 102 شرپسندوں کا ٹرائل  جاری 

ڈی جی آئی ایس پی آر میجر جنرل احمد شریف (فائل فوٹو)

پاک فوج کے ترجمان  نے کہا ہے کہ فوجی عدالتوں میں 102 شرپسندوں کا ٹرائل کیا جارہا ہے اور یہ جاری رہے گا۔فوج میں خود احتسابی کا عمل بغیر کسی تفریق کے کیا جاتا ہے۔ان کا کہنا تھاکہ ملٹری کورٹس سے متعلق سپریم کورٹ میں کیس چل رہاہے، اس وقت ملک بھر میں 17 اسٹینڈنگ کورٹس کام کررہی ہیں، ملٹری کورٹس  پہلے سے موجود اور فعال تھیں،یہ  9 مئی کے بعد وجود میں نہیں آئیں ۔انہوں نے واضح کیا کہ آرمی ایکٹ قانون اور آئین کا کئی دہائیوں سے حصہ ہے۔ فوجی ترجمان نے کہا کہ  ثبوت اور قانون کے مطابق سول کورٹس نے ان کیسز کو ملٹری کورٹس منتقل کیا ہے۔ ثبوت دیکھنے کے بعد قانون کے مطابق سول کورٹس نے یہ مقدمات ملٹری کورٹس بھیجے ہیں، ان تمام ملزمان کو مکمل قانونی حقوق حاصل ہیں، اور انہیں اپیل کا بھی حق حاصل ہے۔