اسلام آباد میں چھت گرنے سے ماں بیٹے سمیت 3 جاں بحق

آصف کے مطابق وہ اسلام آباد میں مال کا کام کرتا ہے اور گزشتہ روز سے اپنی ڈیوٹی پر موجود تھا۔اس دوران فون پر گھر رابطہ کیا تو کسی نے فون نہیں اٹھایا جس پر وہ پریشانی کے عالم میں اپنے گھر پہنچا تو وہاں ایک قیامت اس کی منتظر تھی۔مکان کے چھت گری ہوئی تھی اور اس کے اہل خانہ ملبے تلے دب گئے تھے جبکہ آٹھ ماہ کا بچہ مسلسل رو رہا تھا۔
المیہ یہ ہے کہ اہل محلہ اس صورت حال سے بے خبر تھے۔ شور شرابے پر لوگ جمع ہوئے اور ملبہ ہٹایا گیا تو آصف کی اہلیہ اور چھوٹا بھائی چھت گرنے اور بجلی کے تار کی زد میں آکر کرنٹ لگنے سے دم توڑ چکے تھے۔

آٹھ ماہ کے بچے کو زخمی حالت میں اسپتال پہنچایا گیا تاہم چند گھنٹے بعد وہ بھی چل بسا۔ آصف کے مطابق وہ بہت مشکل سے گزر بسر کرتا ہے اور چند ماہ پہلے اس نے اپنی مدد آپ کے تحت اسلام آباد کے دیہی علاقے جاوا میں مکان تعمیر کیا تھا جو آج اس کے خاندان کیلئے قبرستان ثابت ہوا۔