صدر علوی کی غیر موجودگی میں حکومت کا بڑا چھکا

تفصیلات کے مطابق سینٹ کے بعد قومی اسمبلی نے بھی تاحیات نااہلی کے قانون میں ترمیم منظور کرلی ہے اور اس کی مدت زیادہ سے زیادہ 5 برس کر دی گئی ہے جس کے بعد مسلم لیگ نون کے سربراہ سابق وزیراعظم میاں نواز شریف کی نااہلی ختم ہونے کی راہ ہموار ہو گئی ہے اور اب وہ پارلیمانی سیاست میں حصہ لے کر ایک بار پھر وزیر اعظم بننے کی پوزیشن میں آ جائیں گے۔ ترمیم کا فائدہ تحریک انصاف کے سابق سربراہ اور حال ہی میں استحکام پاکستان پارٹی بنانے والے جہانگیر ترین کو بھی ہوگا تاہم اگر کسی مقدمے میں عمران خان کو نااہلی کی سزا ہوتی ہے تو وہ پانچ سال کے لیے پارلیمانی سیاست سے باہر ہو جائیں گے۔

 نواز شریف کو واپس کیسے لایا جائے؟ قانونی ٹیم تشکیل

دوسری طرف نواز شریف کی وطن واپسی کی راہ میں حائل رکاوٹیں دور کرنے کے لیے حکومت نے قانونی ماہرین کی  ٹیم تشکیل دے دی ہے جس میں وزیر قانون اعظم نذیر تارڑ ، وزیر مملکت عطااللہ تارڑ اور وزیراعظم کے معاون خصوصی عرفان قادر شامل ہوں گے۔علاوہ ازیں نواز شریف کے خلاف قائم مختلف مقدمات میں ریلیف حاصل کرنے کے لیے امجد پرویز اور دیگر وکلاء کی ٹیم کو بھی ذمہ داری سونپی گئی ہے۔
یہ امر قابل ذکر ہے کہ میاں نواز شریف اس وقت متحدہ عرب امارات میں ہیں ، جہاں لندن سے آنے پر انھیں شاہی پروٹوکول دیا گیا ہے اور رہائش کے لیے شاہی خانہ پیش کیا گیا ہے۔
میاں نواز شریف بی کے بعد ابوظہبی اور پھر سعودی عرب جائیں گے جہاں وہ مریم نواز اور خاندان کے دیگر افراد کے ہمراہ حج ادا کریں گے۔

الیکشن ایکٹ میں کیا ترمیم کی گئی؟

حکومت کی جانب سے اتوار کے روز قومی اسمبلی میں الیکشن ترمیمی بل منظوری کے لیے پیش کیا گیا جس میں آئین کے آرٹیکل 62 ون ایف کے تحت انتخابی ایکٹ میں ترمیم تجویز کی گئی ہے۔اس کے ساتھ الیکشن اصلاحات بل 2017 میں ترمیم کی گئی ہے جسے الیکشن ایکٹ 2019 کے طور پر منظور کر لیا گیا ہے۔نئی ترمیم کے مطابق آئین کے آرٹیکل 62 ون ایف کے تحت اب نایلی کی سزا پانچ برس ہوگی۔ الیکشن ایکٹ 2023 کے تحت عام انتخابات کی تاریخ کا اعلان کرنے کا اختیار کلی طور پر الیکشن کمیشن آف پاکستان کو دے دیا گیا ہے جس کے لیے وہ صدرمملکت کے ساتھ مشاورت کا پابند نہیں ہو گا۔ علاوہ ازیں الیکشن کمیشن انتخابی تاریخ میں ردوبدل بھی کرسکے گا۔واضح رہے کہ سینیٹ نے چند روز قبل الیکشن ایکٹ 2030 منظور کر لیا تھا۔

صدر علوی کی عدم موجودگی سے بھرپور فائدہ اٹھانے کی تیاری

صدر مملکت ڈاکٹر عارف علوی نے اپنے خاندان کے افراد اور سٹاف کے ہمراہ حج کے لیے روانہ ہوگئے ہیں۔ مبصرین کے مطابق الیکشن ایکٹ میں ترمیم اور نااہلی بل کی منظوری ایک ایسے وقت میں عمل میں لائی گئی ہے جب صدر مملکت ملک میں موجود نہیں ہوں گے اور ان کی جگہ چیئرمین سینیٹ صادق سنجرانی قائم مقام صدر کا منصب سنبھالیں گے۔ایسی صورت میں ایوان صدر سے ترمیم کی منظوری میں کوئی رکاوٹ پیش نہیں آئے گی جو کہ تحریک انصاف سے وابستہ صدر کی موجودگی میں پیش آسکتی تھی واضح رہے کہ صدر ڈاکٹر عارف علوی نے اس سے پہلے کیا ہم قوانین اعتراضات کے ساتھ واپس کر دیے تھے۔