وزیر اعظم کےمشیر امیرمقام پر قاتلانہ حملہ ناکام

تفصیلات کے مطابق امیرمقام ہفتے کے روز اپنے آبائی ضلع شانگلہ کے علاقے مارتونگ کے دورے پر تھے اور اس دوران انہوں نے نادرادفتر کا افتتاح اور جلسے سے خطاب کیا،اسی دورے کے دوران علاقے میں ہوائی فائرنگ کی گئی جبکہ مشکوک مسلح افرادبھی دیکھے گئے جس پر پولیس کی بھاری نفری علاقے میں پہنچ گئی۔

ڈی آئی جی ملاکنڈڈویژن ناصرمحمودستی نے بتایا کہ پولیس کو اطلاع ملتے ہی پورے علاقے میں ہائی الرٹ کردیاگیا اور علاقے کو گھیرکر سرچ آپریشن شروع کردیا گیا تاہم کوئی گرفتاری عمل میں نہیں آئی، دوسری جانب انجینئر امیرمقام نے بتایا کہ اس سے قبل اسی مقام پر 2014میں بھی ان پر خودکش حملہ ہواتھا جس میں ان کے ساتھی شہید ہوئے تھے

دوسری جانب کالعدم تحریک طالبان کی جانب سے یہ بیان سامنے آیا کہ امیر مقام پر مائنز کے ذریعے حملہ کرنے کی کوشش کی گئی لیکن فنی خرابی کے باعث یہ حملہ کامیاب نہ ہوسکا۔