یاسمین راشد،خدیجہ شاہ،اعجاذ چوہدری کی ضمانت خارج

جمعرات کو  انسداد دہشت گردی عدالت کے جج اعجاز احمد بٹر نے  جناح ہاؤس جلاؤ گھیراؤ کیس میں خدیجہ شاہ اور فہمیدہ بیگم کی درخواست ضمانت خارج کر دی۔یاسمین راشد کی درخواست عدم پیروی اور اعجاز چوہدری کی عسکری ٹاور حملہ کیس میں درخواست ضمانت واپس لینے کی بنیاد پر خارج کر دی گئی۔عدالت نے جناح ہاؤس جلاؤ گھیراؤ کیس میں 6 ملزمان کی ایک ایک لاکھ روپے کے مچلکوں کے عوض ضمانت منظور کرتے ہوئے رہائی کا حکم دے دیا۔ان ملزمان میں علی نواز ایڈووکیٹ، سجاول علی خان، علی احمد، زاہد پرویز، کاشف محمود اور مکرم طاہر شامل ہیں۔

ادھر راولپنڈی میں  سابق وزیر مملکتداخلہ شہریار آفریدی کو 9 مئی کو  ہونے والی ہنگامہ آرائی کے دوران جی ایچ کیو پر حملوں سے متعلق کیس میں 5 روزہ جسمانی ریمانڈ پر پولیس کی تحویل میں دے دیا گیا۔ایک روز قبل شہریار آفریدی کو انڈسٹریل ایریا تھانے میں ان کے خلاف درج 9 مئی کی ہنگامہ آرائی سے متعلق مقدمے میں ضمانت مل گئی تھی۔جب شہریار آفریدی اڈیالہ جیل میں تھے، آر اے بازار پولیس نے انہیں اپنی تحویل میں لے کر راولپنڈی کی انسداد دہشت گردی کی عدالت میں پیش کیا تھا۔