غلام سرور خان اورہمایوں اختربھی تحریک انصاف چھوڑ گئے

جمعرات کے روز اسلام آباد میں پریس کانفرنس  سے خطاب کرتے ہوئے غلام سرور خان نے کہا کہ مجھے اور میرے خاندان کو سیاست میں  50 سال ہوچکے ہیں، جہاں تک 9 مئی کے واقعہ کا تعلق ہے، بحیثیت پاکستانی کہتا ہوں کہ جی ایچ کیو، کور کمانڈر ہاؤس اور شہدا کی یادگاروں کے حملہ آور ملک دشمنی کے مرتکب ہوئے ہیں۔ شرپسندوں نے جی ایچ کیو اور کورکمانڈر ہاؤس پر  نہیں بلکہ پاکستان کے دل اور پاکستانیت پر حملہ کیا، میں ان کے تمام ناپاک عزائم اورناپاک اقدام کی بھرپور مذمت کرتا ہوں، ایسے لوگوں کو قرار واقعی سزادینی چاہیے۔انہوں نے مزید کہا کہ جن لوگوں نے اداروں کے ساتھ محاذ آرائی کی، میں اُسکی بھی بھرپور مذمت کرتا ہوں، میں نے پارٹی کے ہر فورم پر بھی کہا کہ ہمیں محاذ آرائی نہیں کرنی چاہیے، اداروں کے ساتھ لڑائی نہیں کرنی لیکن جو کچھ ہوا، بُرا ہوا اس بنا پر تحریک انصاف سے علیحدگی کا اعلان کرتا ہوں۔

ادھر سابق وفاقی وزیر تجارت ہمایوں اختر خان نےبھی تحریک انصاف چھوڑنے کا اعلان کردیا۔سماجی رابطے کی سائٹ پر اپنے ایک بیان میں ہمایوں اختر خان کا کہنا ہے کہ قیام پاکستان سے لے کر آج تک ہمارے خاندان کا پاک فوج سے لازوال تعلق قائم ہے اور میرے والد شہید اختر عبدالرحمٰن جس فوج کے جرنیل تھے اس پر ہمیں فخر ہے اور ہمیشہ رہے گا۔  ہمارے شہداء کا لہو اور قربانیاں یہ قوم کبھی فراموش نہیں کرے گی۔انہوں نے کہا کہ 9 مئی کے واقعات نے پوری قوم کی طرح ہمارے خاندان کو بھی انتہائی افسردہ کیا، بالخصوص شہداء کی یادگاروں کو جو نقصان پہنچایا گیا وہ شہید کی اولاد ہونے کے ناطے اُن کے لیے شدید باعثِ رنج تھا اور اس کی جتنی مذمت کی جائے کم ہے۔