انسانی اسمگلرز کے گرد گھیرا تنگ، کشتی حادثے کے بعد ادارے متحرک

ذرائع کا کہنا ہے کہ نوجوانوں کو دولت کمانے کے خواب دکھا کر بیرون ملک غیر قانونی طور پر بھیجنے والے ایجنٹوں اور انسانی اسمگلرز کے خلاف کریک ڈاون شروع کردیا گیا ہے اور پولیس ایف آئی اے سمیت متعلقہ اداروں نے اسلام آباد شیخوپورہ اور آزاد کشمیر میں چھاپا مار کر کشتی حادثے کے مرکزی ملزم سمیت انسانی اسمگلنگ میں ملوث 11 ایجنٹ گرفتار کر لیے ، ایف آئی اے کے مطابق مرکزی ملزم طلحہ شاہ زیب کو شیخوپورہ سے گرفتار کیا گیا ہے جس نے فاروق آباد کے رہائشی زاہد اکبر سے لیبیا بھیجنے کے 65 لاکھ وصول کئے تھے۔

ادھر ڈی آئی جی پولیس میرپور ڈاکٹر خالد محمود چوہان کا کہنا ہے کہ کشتی حادثے کے بعد انسانی اسمگلنگ میں ملوث ایجنٹوں کے خلاف گرینڈ آپریشن شروع کر دیا گیا ہے اور صرف آزاد کشمیر کے علاقے کوٹلی کھوئی رٹہ میں انسانی اسمگلنگ میں ملوث 10 ملزمان کو گرفتار کرکے ان کے خلاف مقدمہ درج کر لیا گیا ہے ۔مقدمے میں قتل بالسبب اور فراڈ کی دفعات شامل کی گئی ہیں تاکہ ملزمان کو سزا دلوانے میں مشکل پیش نہ آئے۔

اس حوالے سے ایس پی کوٹلی ریاض مغل نے پریس بریفنگ میں بتایا کہ کچھ عرصہ قبل چوہدری ذوالقرنین ولد میر زمان قوم جاٹ ساکن دھناں حال مقیم لیبیا، شہباز ، طلعت، ساجد جنہوں نے مقامی ملزمان پر مشتمل انسانی اسمگلنگ کا منظم گروہ بنا رکھا ہے ۔ان اسمگلرز نےمتعدد افراد کو یورپ لے جانے کا جھانسا دے کر ان سے بھاری رقم بٹوری اور 14 جون کو اویس طارق ، توقیر، ساجد ، محمد اسلام ، ساجد یوسف ، عبدالجبار، محمد سفیر،محمد یاسر، محمد عمران، شمریز ، علی صابر، نبیل ،سنیل ، آزاد ، فریاد، ناصر اقبال، آکاش گلزار ، رئیس رفتاج ، محمدا رشد ، خالد حسین ، حامد اقبال ، عدنان شبیر ، حسیب الرحمن نامی افراد کو کشتی  میں بٹھایا ،جس میں 300 لوگوں کے بیٹھنے کی گنجائش تھی مگر اس میں 800افرادسوار کرائے گئے جو یونان کے ساحل پر سمندری حدود میں اُلٹ گئی۔

حادثے میں عدنان شبیر اور حسین الرحمن زندہ بچ گئے جن کا کہنا ہے کہ ا ن کے علاوہ کشتی میں سوار تمام لوگ ڈوب گئے تھے ،ان میں کچھ کی لاشیں نکالی گئی ہیں جو ناقابل شناخت ہیں ۔ان کا کہنا تھا کہ ہماری تحصیل کے 24 سے زائد افراد جان کی بازی ہار گئے ہیں جبکہ انسانی اسمگلنگ میں ملوث گروہ کے کارندوں نوید یعقوب ، مہتاب، آصف خان ، بابر رشید، مناظر حسین ، ظفر محمود، ارشد محمود، سہیل اقبال، فرید خان کو گرفتار کر لیا گیا ہے ،ان ملزمان کیخلاف قانون کے مطابق کارروائی عمل میں لائی جارہی ہے۔