سمندری طوفان کی دستک ، کراچی کے شہری خوف میں مبتلا

کراچی کے ساحل پر احتیاطی اقدامات
خوف کا بنیادی سبب یہ ہے کہ کراچی جیسا گنجان آبادی والا سب سے بڑا شہر تھوڑی سی بارش کے لئے بھی انتظامی طور پر تیار نہیں ہے اور چند منٹ کی بارش شہر کو جل تھل کر دیتی ہے۔سمندری طوفان کے باعث بارش کے ساتھ شدید ترین تیز ہوائیں بھی چلنے کا امکان ہے جب کہ کراچی میں بڑے بڑے بل بورڈز کا ایک جنگل آباد ہے جسے بار بار کی وارننگ کے باوجود اب تک نہیں ہٹایا جا سکا۔

انخلا تیزی سے جاری 

دوسری طرف کمشنر کراچی اور کمشنر حیدرآباد کی جانب سے جاری اعلامیہ میں کہا گیا ہے کہ سمندری طوفان کے ممکنہ اثرات سے نمٹنے کے لیے تمام تیاریاں مکمل کر لی گئی ہے۔

ساحلی علاقوں سے کم و بیش سی ہزار افراد کے انخلا کا انتظام کیا جارہا ہے جن میں سے تقریبا ایک تہائی لوگوں کو محفوظ مقامات پر منتقل کیا جا چکا ہے۔ کسی ممکنہ ہنگامی صورتحال سے نمٹنے کے لیے پاک فوج ، بحریہ ، رینجرز اور فضائیہ کے دستے بھی الرٹ ہیں۔ جبکہ ایدھی، چھیپا اور دیگر سکیورٹی ادارے بھی صورتحال سے نمٹنے کے لیے تیار ہیں۔لوگوں کو جانی اور مالی نقصانات سے بچاؤ کے لئے پاک فوج اور سول انتظامیہ پوری طرح متحرک ہے اور اس حوالے سے تمام تر ممکنہ پیشگی اقدامات کیے جارہے ہیں۔

کمشنر کراچی کا اعلامیہ

جوں  جو ں سمندری طوفان کراچی کے ساحل کے قریب آتا جا رہا ہے اس کے اثرات بھی نمایاں ہو رہے ہیں۔ کیٹی بندر شہر کو مکمل طور پر خالی کروا دیا گیا ہے اور وہاں اب ہو کا عالم ہے۔

پی آئی اے نے آج کی تمام پروازیں منسوخ کر دیں

سمندری طوفان کے پیش نظر پی آئی اے نے آج کی تمام پروازیں منسوخ کر دی ہیں اور ممکنہ خطرات سے نمٹنے کے لئے خصوصی ٹیمیں تشکیل دے دی گئی ہیں۔حکام کے مطابق ممکنہ تیز ہو اور گردو غبار کی وجہ سے پروازوں کا رخ متبادل ہوائی اڈوں کی جانب موڑنے کا فیصلہ کیا گیا ہے۔قومی ایئر لائن کی سیفٹی ٹاسک فورس کو بھی متحرک کر دیا گیا ہے جو آپریشنل ایریا پر موجود حالات اور جہازوں کی حفاظت کی ذمہ داری ادا کرے گی۔

جناح انٹرنیشنل ایئر پورٹ کراچی

ادھر کمشنر کراچی نے ممکنہ ہنگامی صورتحال کے باعث اگلے دو روز میں ہونے والے تمام امتحانات ملتوی کرنے کا اعلان کیا ہے جبکہ تعلیمی سیمینارز اور دیگر تقریبات بھی منعقد نہیں کی جائے گی۔انٹر بورڈ کی جانب سے 14 اور 15 جون کو ہونے والے امتحانات بھی ملتوی کر دیے گئے ہیں۔