عمران خان کی میڈیکل رپورٹ نے  کھلبلی مچا دی

عبدالقادر پٹیل نے بتایا  کہ گرفتار ی پر  پمز اسپتال میں سینئر ڈاکٹروں کے پینل نے عمران  کا میڈیکل ٹیسٹ کیا تھا لیکن رپورٹ سامنے آنے سے پہلے ہی ان کو رہا کردیا گیا۔وزیر صحت کی جانب سے پریس کانفرنس کے دوران جاری کی گئی رپورٹ پمز کے 5 رکنی پینل نے تیار کی ہے، جس میں ڈاکٹر رضوان تاج، ڈاکٹر ساجد ذکی چوہان، ڈاکٹر ارشاد حسین، ڈاکٹر اسفندیار خان اور ڈاکٹر سید مہدی حسن نقوی شامل ہیں۔

عمران خان کی میڈیکل رپورٹ

میڈیا کو جاری کردہ رپورٹ میں بتایا گیا ہے کہ گزشتہ چند ہفتوں میں پیش آنے والے واقعات کے حوالے سے عمران خان شدید  غصے اور دباؤ کا شکار ہیں، ذہنی استحکام پر سوالیہ نشان ہے اور حرکات و سکنات بھی معمولی نہیں ہیں۔تاہم رپورٹ میں عمران خان کو ذہنی اور جسمانی  طور پر  مستحکم قرار دیتےہوئے نیب کی حراست کے لیے فٹ قرار دیا گیا ہے۔ عبدالقادر پٹیل کا کہنا تھا کہ عمران خان کا یورین سیمپل بھی لیا گیا ، جب تک پورا تناسب سامنے  نہیں آجاتا میں رپورٹ جاری نہیں کروں گا لیکن ابتدائی رپورٹ میں نشے آور چیزیں  ٹریس ہوئی ہیں ،خاص کر شراب اور کوکین کا بے دریغ استعمال ہوا ہے، جب تناسب نکل آئے گا کہ اس میں کتنا فیصد پاؤڈر، کوکین اور شراب ہے تو وہ بھی جاری کردی جائے گی۔

انہوں نے دعوٰی کیا  کہ عمران خان کی  ٹانگ میں  کوئی فریکچر نہیں تھا اس کے باوجود جن ڈاکٹروں نے اس کافریکچر ڈیکلیئر کیا ہے تو ہمارے پاس ڈاکٹر، اسپتالوں اور میڈیکل کالج ریگٓیولیٹ کرنے کے لیے پی ایم ڈی سی موجود ہے جو غلط اقدامات پر کارروائی کرتا ہے۔ میں انہیں لکھوں گا کہ اس کا فریکچر نہیں تھا تو 5 مہینے پلاسٹر کیوں چڑھایا، کن ڈاکٹروں کے مشورے پر چڑھایا ان سے پوچھا جائے۔

ادھر پی ٹی آئی  نے  وزیرصحت کی پریس کانفرنس کو شرم ناک قراردیتے ہوئےکہا ہےکہ تحریک انصاف نے وزیرصحت اور ان کے معاونین کے خلاف بھرپور قانونی چارہ جوئی کا فیصلہ کیا ہے اور چیئرمین پی ٹی آئی عمران خان نے عبدالقادر پٹیل، نیب، وزارت صحت اور پمز اسپتال کے ڈاکٹروں کو قانون کے کٹہرے میں لانے کی منظوری دے دی ہے۔