تحریک انصاف سے اہم رہنماؤں کی علٰیحدگی کا سلسلہ تیز

اسلام آباد پریس کلب میں پریس کانفرنس سے خطاب کرتے ہوئے فردوس عاشق اعوان نے کہا کہ عمران خان کا ایجنڈا ملک کیلئے زہر قاتل بن گیا ہے، انہوں نے اپنے سابق قائد کو آڑے ہاتھوں لیتے ہوئے کہا کہ عمران خان پہلے دشمنوں کیلئے نہیں دوستوں کیلئے دشمن بنتے ہیں، عمران خان اور پاکستان ساتھ ساتھ نہیں چل سکتے۔انہوں نے کہا کہ میں حالیہ دہشت گردکارروائیوں کی وجہ سےپی ٹی آئی کاحصہ نہیں رہناچاہتی،اپنے 22 سالہ سیاسی سفرمیں ایساماحول اور منظرنہیں دیکھا۔  ان واقعات میں ملوث افرادکو عبرتناک سزا دی جائے۔ واقعات کی آزادانہ انکوائری کی جائے۔انہوں نے الزام لگایا  کہ 9 مئی کے واقعات کے زمان پارک سے منصوبہ بندی کی گئی، بیرونی ایجنڈےپرسازش تیارکی گئی، سازش کا مقصداداروں کی تضحیک اور غیرملکی آقاؤں کوخوش کرناتھا، منصوبہ بندی کے تحت شہدا کی یادگاروں پر حملہ کیاگیا۔ اپنے چشم وچراغ قوم کودینے والوں کوسلام پیش کرتے ہیں۔

سینیٹر سیف اللہ نیازی عمران خان کے ساتھ ۔ فائل فوٹو

اسی طرح عمران خان کے قریبی عزیز سینیٹر سیف اللہ نیازی نے بھی تحریک انصاف کو چھوڑنے کا اعلان کرتے ہوئے کہا کہ نو مئی کے واقعات کی مذمت کرتا ہوں، عوامی املاک کو نقصان پہنچانے کی اجازت اسلام بھی نہیں دیتا، مجھے اب آرام کرنا اور فیملی کو وقت دینا ہے، ادھر فیصل آباد سے سابق رکن قومی اسمبلی خرم شہزاد نے بھی تحریک انصاف چھوڑنے کا اعلان کرتے ہوئے  کہا کہ 13سال پارٹی میں رہا،چھوڑتےہوئےآنکھیں نم توہوں گی، جینامرناپاکستان کےساتھ ہےبیرون ملک جانےکاارادہ نہیں، 9مئی کاواقعہ ہماری سوچ سے بالاترہے۔

معروف گلوکار اور پی ٹی آئی کے رہنما ابرار الحق نے لاہور میں پریس کانفرنس کرتے ہوئے کہا کہ شہداء نے اپنے وطن کیلئے جانوں کو قربان کیا، سیاست میں آنے کا مقصد بڑا کام کرناتھا، آج کی سیاست میں خدمت کاعنصرنظرنہیں آتا، شایدہی کوئی ہو گا جس نے 9 مئی کےواقعات کی مذمت نہ کی ہو، ہم ایساکام کیوں کریں کہ آگےکچھ نظرنہ آئے، ہمیں پاکستان کیلئےکچھ بڑاکرناہے، بہت کچھ کرسکتےہیں۔

گلوکار ابرار الحق

عمران خان کے قریبی دوست اور سابق وزیرتعلیم مراد راس  نے لاہور میں پریس کانفرنس کرتے ہوئے کہا کہ ہم 9 مئی کی تحریک پر مبنی سیاست سے اتفاق نہیں کرتے۔ انہوں نے کبھی بھی ایسا دن نہیں سوچا تھا کہ وہ عمران سے علیحدگی اختیار کر لیں گے۔مراد راس نے روتے ہوئے کہا کہ کوئی بھی نہیں چاہتا کہ اداروں سے لڑائی ہو، اختلاف رائے  کو بیٹھ کر حل کیا جا سکتا ہے۔ ہم سب کو یہی رہنا ہے اور مذاکرات کے لیے افغانستان، چین یا امریکا سے بندے لے کر نہیں آنا ہے بلکہ ملک میں موجود لوگوں سے مذاکرات کرنا ہے۔ ملک کے حالات لڑائی سے بہتر نہیں ہوسکتے اور یہ ہم نے دیکھا ہے۔اس موقع پر انہوں نے پارٹی چھوڑنے کا اعلان کیا اور کہا کہ 9 مئی کے واقعات پر پارٹی چھوڑنے کا اعلان کرتا ہوں، 9 مئی کی طرح کی پی ٹی آئی کی احتجاج کی سیاست سے اتفاق نہیں کرتے اور ہم عمران خان اور پی ٹی آئی سے اپنے راستے جدا کر رہے ہیں، اس کا دن کا کبھی سوچا نہیں تھا، یہ دن کتنا مشکل ہے سوچا نہیں جا سکتا۔

مراد راس ساتھی ایم پی ایز کے ساتھ پریس کانفرنس کرتے ہوئے

ہم نے فیصلہ کیا ہے کہ ہم خیال لوگوں کا گروپ بنائیں جو اس مقصد لے کر آگے بڑھے کہ ملک اور پاکستان کے لیے بہتر ہو جس کے لیے میں پارٹی میں تھا اور نمبر ون ترجیح پاکستان اور عوام تھے۔ ہمارا گروپ چاہتا ہے کہ اور ہم خیال لوگ آئیں، ہم مسلم لیگ (ن) یا پیپلزپارٹی کی طرح نہیں ہیں۔

ادھر پنڈی بھٹیاں سے تحریک انصاف کے سابق ایم پی اے میاں احسن انصر بھٹی نے بھی پارٹی سے علیحدگی اختیار کر لی۔ انہوں نے کہا کہ 9 مئی کے واقعہ پر انتہائی تکلیف ہوئی۔علاوہ ازیں سابق صوبائی مشیر جیل خانہ جات خیبرپختون ملک قاسم خان نے ساتھیوں سمیت پی ٹی آئی چھوڑنے کا اعلان کر دیا۔پشاور میں پریس کانفرنس کرتے ہوئے ملک قاسم خان نے کہاکہ سب اتفاق رائے سے پی ٹی آئی چھوڑ رہے ہیں ،ہم پر کوئی دباﺅ نہیں، ہم رضاکارانہ طور پرآئے ہیں ۔ملک قاسم کا کہنا تھا کہ 2013 میں آزاد حیثیت سے منتخب ہوا تھا، بہت کچھ برداشت کیا، آئندہ کا لائحہ عمل ساتھیوں کی مشاورت سے کریں گے۔

رابعہ اظفر

پی ٹی آئی کی سابق  ایم پی اے رابعہ اظفر نے بھی پارٹی کو خیر باد کہہ دیا۔ ٹوئٹر اپنے بیان میں پی ٹی آئی کی ایم پی اے رابعہ اظفر نے کہا کہ تحریک انصاف کے تمام عہدوں سے مستعفی ہوتی ہوں۔انہوں نے کہا کہ 9 مئی کے واقعات کی پرزور الفاظ میں مذمت کرتی ہوں، میں ایک تعمیری مقصد کے تحت سیاست میں آئی تھی۔انہوں نے کہا کہ افواج پاکستان ملک کی تحفظ کی ضامن ہیں، اپنے بچوں کو سیاسی ایڈونچر کے رسک پر نہیں ڈال سکتی۔