جلاؤ گھیراؤ کیس میں مطلوب معروف فیشن ڈیزائنر خدیجہ شاہ گرفتار

واضح رہے کہ دو روز قبل  خدیجہ شاہ کی ایک  آڈیو سامنے آئی تھی جس میں انہوں نے خود کو پولیس کے حوالے کرنے کا کہا تھا مگر پولیس کو گرفتاری دینے کے بجائے وہ گھر سے فرار ہوگئی تھیں۔ تاہم اب پولیس  نے تصدیق کی ہے کہ جناح ہاؤس میں توڑ پھوڑ اور جلاؤ گھیراؤ کیس میں مطلوب خدیجہ شاہ کوگرفتارکرلیاگیا ہے۔

خدیجہ شاہ کون ہیں؟ کس کس نے ان کی سفارش کی؟

گرفتاری پیش کرنے والی خدیجہ شاہ  سابق  چیف  آف آرمی اسٹاف جنرل آصف نواز جنجوعہ کی نواسی اور پرویز مشرف دور کے وزیرخزانہ سلمان شاہ کی صاحبزادی ہیں۔ان کے شوہر کو پہلے ہی گرفتار کر لیا گیا تھا۔پولیس حراست میں موجود  خدیجہ شاہ کے شوہر جہانزیب کی مخبری پر پولیس نے گلبرگ میں جہانگیر ترین کی بیٹی مہر ترین کے اپارٹمنٹ میں چھاپا مارا لیکن پولیس والوں کی آمد سے چند منٹ قبل خدیجہ وہاں سے فرار ہوچکی تھیں۔

سینئر صحافی عمر چیمہ کی رپورٹ کے مطابق خدیجہ شاہ کو ریلیف دلوانے کے لیے جہانگیر ترین کے قریبی ساتھی اور وزیراعظم کے معاون خصوصی عون چوہدری، مسلم لیگ (ق) کے سربراہ چوہدری شجاعت حسین،وزیر اعظم  شہباز شریف کے پرانے دوست اور خدیجہ کے سسر سرمد امین نے بھی وزیراعظم سمیت مختلف بااثر شخصیات سے رابطے کیے لیکن  یہ تمام کوششیں کارگر ثابت نہ ہوسکیں۔ رپورٹ کے مطابق خدیجہ شاہ کے لیے ریلیف مانگنے والوں  پر واضح کر دیاگیا کہ افواج پاکستان نے 9 مئی کے واقعات میں ملوث ہر شخص کے لیے عدم برداشت کی پالیسی اختیار کر رکھی ہے۔ واضح رہے کہ  لندن کے اعلیٰ تعلیمی اداروں کی ڈگری ہولڈر خدیجہ شاہ  برطانوی شہری ہیں اور انہوں نے کئی آڈیو پیغامات چھوڑے ہیں جن میں انہوں نے کہا کہ وہ بے قصور ہیں۔