تحریک انصاف سے اڑان بھرنے والے سیاسی پرندوں کی رفتار تیز

تحریک انصاف کے رہنما ایک ایک کر کے پارٹی سے علٰیحدگی اختیار کرتے جا رہے ہیں۔ منگل کو سابق رکن پنجاب اسمبلی  جلیل شرقپوری نے بھی پارٹی کو خیرباد کہہ دیا۔

اپنے ایک ویڈیو بیان میں جلیل شرقپوری کا کہنا تھا کہ میں پاک فوج کے ساتھ ہوں، پی ٹی آئی کی پالیسیوں کی وجہ سے اس کا حصہ نہیں رہ سکتا، پی ٹی آئی کو نالائق قرار دیتے ہوئے انہوں نے کہا   کہ  9 مئی کے واقعے پر بہت افسردہ ہوں، مکمل ذمہ داری عمران خان کی ہے۔ عمران خان نے پاکستان کی نوجوان نسل کو اکسایا، میں کسی سیٹ کا امیدوار نہیں، میرے حلقے کا ٹکٹ دیتے ہوئے مجھ سے مشورہ بھی نہیں کیا گیا،

شاہ محمود پھر گرفتار

ادھر ذرائع کا دعوٰی ہے کہ  تحریک انصاف کی ترجمان مسرت جمشید چیمہ اور ان کے شوہر جمشید چیمہ نے بھی پارٹی چھوڑنے کا فیصلہ کر لیا ہے تاہم ان اطلاعات کی صحت اس وقت عارضی طور پر مشکوک ہو گئی جب ان دونوں میاں بیوی کو سینئر رہنما شاہ محمود قریشی کے ہمراہ اڈیالہ جیل سے رہا ہوتے ہی دوبارہ گرفتار کر لیا گیا۔ قبل ازیں دونوں کے پارٹی چھوڑنے کے فیصلے کا دعویٰ ان کے وکیل نے اسلام آباد ہائیکورٹ میں کیا۔ملک محمد ریاض نے کہا کہ دونوں رہنما جلد پی ٹی آئی چھوڑنے کا اعلان کریں گے۔

ادھر خانیوال سے تعلق رکھنے والے تحریک انصاف کے رکن پنجاب اسمبلی عبدالرزاق خان نے بھی پارٹی چھوڑنے کا اعلان کردیا ہے۔پریس کانفرنس سے خطاب کرتے ہوئے عبدالرزاق خان نے کہا کہ میں پارٹی ٹکٹ پی ٹی آئی اور عمران خان کو واپس کررہا ہوں، اور  پارٹی سے بھی استعفیٰ دیتا ہوں، میں فوج کے ساتھ کھڑا ہوں۔واضح رہے کہ3 روز قبل پی ٹی آئی کو ایک اور بڑا دھچکا اس وقت لگا تھا جب اس کے رکن قومی اسمبلی اور کراچی  کے صدر آفتاب صدیقی نے 9 مئی کے پرتشددواقعات کی مذمت کرتے ہوئے پارٹی چھوڑنے کا اعلان کیا تھا۔آفتاب صدیقی کے اعلان کے ساتھ استعفے دینے کے حالیہ سلسلے میں پی ٹی آئی ایک ہفتے کے اندر اندر کراچی سے اپنے چار اراکین اسمبلی سے محروم ہوگئی تھی،

حال ہی میں جیل سے رہا ہونے والے امین گنڈاپور

اس سے قبل ایم این اے محمود مولوی اور ایم پی اے ڈاکٹر سنجے گنگوانی اور ڈاکٹر عمران علی شاہ نے بھی اسی بنیاد پر ایسے ہی اعلانات کیے تھے۔ان کے علاوہ خیبرپختون سے پی ٹی آئی کے دو رہنماؤں ، اجمل وزیر اور سید ذوالفقار علی شاہ ، نے بھی یہی دعویٰ کرتے ہوئے پارٹی چھوڑ دی کہ 9 مئی کے واقعات کے بعد ان کے لیے پارٹی میں رہنا ممکن نہیں رہا۔ضلع لکی مروت سے تعلق رکھنے والے کے پی کے سابق وزیر ہشام انعام اللہ خان اور ضلع صوابی سے سابق ایم این اے انجینئر عثمان خان تراکئی نے بھی پی ٹی آئی سے علیحدگی اختیار کر لی تھی۔

پیر کے روز تحریک انصاف ویسٹ پنجاب صدر کے رہنما فیض اللہ کموکا نے بھی پارٹی چھوڑنے کا اعلان کردیا تھا،  سابق وفاقی وزیر عامر کیانی بھی پارٹی چھوڑنے کا اعلان کرچکے ہیں۔

تحریک انصاف/ قطار