25 مئی کو ”یومِ تکریم شہدائے پاکستان“ منانے کا اعلان

 چیف آف آرمی اسٹاف  جنرل عاصم منیر نے 25 مئی کو یومِ تکریمِ شہدائے پاکستان منانے کا اعلان کردیا۔پیر کے روز  جنرل ہیڈ کوارٹرز راولپنڈی میں تقریبِ تقسیم اعزازات سے خطاب میں آرمی چیف جنرل عاصم منیر نے کہا کہ شہدا کی فرض شناسی اور عظیم قربانیوں کےطفیل ہم آزاد فضا میں زندگی بسرکررہے ہیں، شہدا کی قربانیاں اور غازیوں کی خدمات ہمارا قیمتی اثاثہ ہیں۔انہوں نے کہا کہ پاک فوج بطور ادارہ اپنے ہرفرد کواور اس کےلواحقین کوہمیشہ یاد رکھتا ہے، ہمارا یہ رشتہ بطور خاندان قابلِ فخر اور فقید المثال ہے۔

آرمی چیف نے 25 مئی کو یومِ تکریمِ شہدائے پاکستان منانے کا اعلان کیا اور کہا کہ ہر سپاہی تعصبات اورامتیازات سے بالاتر ہوکر اپنے فرائض اورذمہ داریوں کومقدم رکھتا ہے، انہوں نے کہا کہ مضبوط فوج مملکت کی سلامتی اور اتحاد کی ضامن ہوتی ہے۔جنرل عاصم منیر نے فوجی تنصیبات، یادگاروں اور شہدا کی حرمتوں پر حملوں کوانتہائی افسوس ناک اور قطعی طور پر ناقابلِ برداشت قرار دیا۔

یوم تکریم شہدا پر ملک بھر میں تقریبات کا انعقاد کیا جائے گا،جی ایچ کیو کی یادگار شہدا پر مرکزی تقریب منعقد ہو گی،افواج پاکستان،پولیس اور دیگر قانون نافذ کرنے والے اداروں کی یادگار شہدا پر سلامی دی جائے گی۔پاک فضایۂ کے ہیڈ کواٹرز،پاک بحریہ کے ہیڈ کواٹرز اور پولیس کی متعدد یادگار شہدا پر بھی تقریبات ہوں گی،صوبائی دارالحکومت سمیت آزاد کشمیر اور گلگت بلتستان میں بھی یاد گار شہدا پر تقریبات ہوں گی۔