"اساں منایا اپنا ماتم”
کل بدھار ستاراں مئی کی "پہاڑی زبان” تے "بہارہ کہو” نے بارے وچ کہڑی کہڑی نی خبر دینے والا فرخ عزیز دنیا جہان سی بے خبر ہوئی ہمیشاں واستے سیئی گا تے اسرے اوہ خوشیاں بنڈنے والا آپوں سوشل میڈیا اپر ہک دکھ تے رنج نی خبر بنی گا۔ پہاڑی زبان اساں نی پچھان گروپ نے منتظمین دکھاں وچ ڈبے ہوئے ہک دووئے کی تسلیاں دینے نی ناکام جہدی کرنے رہے۔ اسرے لگناں سا جسرے ایہہ سارے اپنا ماتم منانے ہون۔
ظہیر چاچو تے فرخ عزیز کی پہاڑی زبان اساں نی پچھان ، مری ڈویلپمنٹ فورم تے عام آدمی لیگ نے احباب یے نئیں مری نیاں فلاحی تے رفاہی تنظیماں تے عام لوک قدر نی نظر نال دکھنے سے۔ موسم پہانویں کہرا باہر نکلنے والا نہ ویہہ تاں وی لعلاں نی یاء جوڑی دکھی سکھی نے موقعے اپر پوہچی ہوئی ہونی سی۔
اج نی دنیا مادیت پرستی نی انتہا نی دنیا ای۔ اج لوک دعا سلام تے دوستی وی اپنے معاشی مفادات کی ساہمنے رکھی تے کرنے۔ خلوص، ہلساں تے دردمندی والے زمانے قصہ پارینہ ہوئی گئے۔ پر اس ماحول وچ وی فرخ عزیز جیئے دردی لوک حالاں وی ،لکھاں وچ ہک ہے سہی، موجود اے تاں یے انسانیت نی مرگ ہمہ گیر ناں مرحلہ نآء آیا۔
پہاڑی زبان اساں نی پچھان گروپ ناں ہر ممبر فرخ بھائی کی جاننا سا۔ جتھیں جتھیں ظہیر چاچو پوہچی تے گروپ نے ممبراں کی سوہنے علاقے، حالات و واقعات، غمی خوشی تے موسم ناں حال دسیا اس وچ بنیادی کردار فرخ بھائی ناں ہونا سا۔ لیکن حریانی نی گل یاء سی جے ہر معاملے وچ اتنی جہدی کرنے والے تے پیش پیش رہنے والے فرخ بھائی کیمرے نے ساہمنے اچھی تے خود نمائی کرنے نے بجائے پس منظر وچ رہی تے چنگا کم کرنے کی ترجیح دینے سے۔ سوشل میڈیا اپر ہر بندہ آپوں زیادے سی زیادے کیمرے نے اگیں رہنا چاہناں، پر فرخ بھائی جیئے قلندر کیمرے نے پچھیں رئی تے ہوراں کی کیمرے نے ساہمنے اشنے ناں پہرپور موقع دینے سے۔
اساں ہک ادبی پروگرام نے سلسلے وچ کہٹھے ہوئے سیاں۔ پہاڑی زبان و ادب نے بڑے بڑے ستارے موجود سے۔ ریکارڈنگ ناں سلسلہ وی جاری رہیا۔ میں فرخ بھائی کی آخیا جے اوہ وی کیمرے نے ساہمنے اچھن تاں جے ویڈیو نے ناظرین انھاں کی وی دکھن۔ انھاں ہک تاریخی جملہ بولیا جس کی کدے ہر کوئی پلے بنہی کہنے تے حالات بہوں بدلی سکنے۔ انھاں ناں جملہ سا۔۔۔۔
” راشد بھائی۔۔۔ اصل اہمیت تو کام کو ملنی چاہیے۔ کیمرے کے سامنے ہوں یا کیمرے کے پیچھے ہمیں چاہیے کہ پوری لگن، خلوص اور توجہ سے اپنا اپنا کام کریں۔ ترجیح کام کو ملنی چاہیے شہرت اور خود نمائی کو نہیں”۔
یوء سا فرخ عزیز ہوراں ناں فلسفہ کار۔ اساں ساریاں کی اپنا اپنا محاسبہ کرنا چائیناں جے اساں اسرے بے غرضی نال کسے وی مقصد نی خذمت کری سکنے آں۔
۔۔۔۔۔۔۔
راشد عباسی
