آرمی چیف کا توڑ پھوڑ کےمنصوبہ سازوں کو کٹہرے میں لانے کا اعلان

آرمی چیف جنرل سید عاصم منیر نےہفتے کے روز کور ہیڈ کوارٹرز پشاور کا دورہ کیا۔ اس موقع پر انہیں موجودہ سیکیورٹی صورت حال اور انسداد دہشت گردی سے متعلق کوششوں کے بارے میں تفصیلی بریفنگ دی گئی۔انہوں نے دہشت گردی کے خلاف جاری جنگ میں قانون نافذ کرنے والے اداروں کی پیشہ ورانہ قابلیت، کارکردگی اور کامیابیوں کو سراہا۔آرمی چیف نے کور ہیڈ کوارٹرز کے افسران سے بھی خطاب کیا اور قومی سلامتی کو درپیش خطرات سے نمٹنے کیلئے تیاریوں پربھی زور دیا۔

انہوں نےواضح کیا کہ ہم امن و استحکام کی اپنی کوششیں جاری رکھیں گے اور اس عمل کو خراب کرنے والوں کی ملک میں کوئی گنجائش نہیں ہوگی۔انہوں نے کہا کہ مسلح افواج اپنی تنصیبات کے تقدس اور سلامتی کو پامال کرنے یا توڑ پھوڑ کی مزید کسی کوشش کو برداشت نہیں کریں گی۔آرمی چیف نے کہا کہ 9 مئی کے یوم سیاہ پر توڑ پھوڑ کے تمام منصوبہ سازوں، مشتعل افراد، اکسانے والوں اور ان پرعمل کرنے والوں کو انصاف کے کٹہرے میں لانے کا عزم کیا ہے۔

اس موقع پر آرمی چیف نےانفارمیشن وارفیئر کی جنگ کے چیلنجوں اور غلط فہمیاں پیدا کرنے کی کوششوں کے بارے میں بھی آگاہ کیا ۔انہوں نے اس بات پر روشنی ڈالی کہ دشمن عناصر کی جانب سے مسلح افواج کو نشانہ بنانے کے لیے بدنیتی سے بھرپور کوشش کی جا رہی ہے تاہم پاکستانی عوام کی حمایت سے ایسی مذموم کوششوں کو ناکام بنایا جائے گا۔قبل ازیں آمد پر کور کمانڈر پشاور نے آرمی چیف کا بھرپور استقبال کیا۔