عمران خان کی پیشی کے موقع پرمزید 130 مظاہرین گرفتار

گزشتہ روزعمران خان کی اسلام آباد ہائی کورٹ پیشی کے دوران سیکورٹی کے انتہائی سخت انتظامات کیے گئے تھے،رینجرز، پنجاب پولیس، ایف سی اور اسلام آباد پولیس قیام امن  کے لیے موجود تھی  اور افواج پاکستان کے دستے بھی مختلف شاہراہوں پر گشت کر رہے تھے، ترجمان پولیس نے بتایا کہ عمران خان کی پیشی کے دوران مشتعل مظاہرین متعدد مقامات پر موجود تھے جن کے پاس پتھر، غلیل، ڈنڈے اور پٹرول بم تھے،سری نگر ہائی وے جی الیون کے پاس مظاہرین نے جمع ہو کر گاڑی کو آگ لگائی،گاڑیوں کو نذر آتش کرنے اور پتھراؤ کرنے والے 85 شر پسند عناصر کو گرفتار کیا گیا جبکہ اسلام آباد ہائی کورٹ کے اطراف سے 15 افراد کو حراست میں لیا گیا۔

اسی طرح جی 13 میں ڈنڈا بردار افراد نے ٹائر جلا ئے اور نجی اور سرکاری املاک کو نقصان پہنچایا  جس پر پولیس نے 30 افراد گرفتار کرلیا،ترجمان نے مزید بتایا کہ شر پسند عناصر نے سری نگر ہائی وے پر تھوڑ پھوڑ کی، جہاں جہاں مظاہرین نے روڈ بند کرنے کی کوشش کی فوری کارروائی عمل میں لائی گئی ،کار سرکار میں مداخلت کرنے والوں کے خلاف قانونی کارروائی عمل میں لائی جائے گی، پنجاب پولیس، رینجرز، ایف سی اور پاک آرمی سیکیورٹی کے فرائض سر انجام دے رہے  تھے۔

ان کا کہنا تھا کہ  کچھ لوگ پولیس کے اداروں کے درمیان اختلاف کی بے بنیاد خبریں پھیلا رہے ہیں،ان سے گذارش ہے قیام امن عامہ کے لیے قانون نافذ کرنے والے اداروں کی مدد کریں۔پولیس کا کہنا ہے کہ قانون نافذ کرنے والے اداروں کے خلاف منصوبہ بندی کے تحت منظم پراپیگنڈہ کیا جارہا ہے، اسلام آباد  پولیس نے  9 مئی  سے آج تک سے 493 افراد کو گرفتار کیا ہے،5 افراد کو ثبوت نہ ہونے کی وجہ سے رہا کیا گیا جبکہ 3 افراد ضمانت پر ہیں۔