اسد عمر، فواد چوہدری، عمرچیمہ سمیت کئی سینئر پی ٹی آئی رہنما گرفتار

سینئر رہنما اسد عمر کو پولیس نے  اسلام آباد ہائی کورٹ کے احاطے سے حراست میں لیا،وہ بابراعوان ، شاہ محمود قریشی اور ملیکہ بخاری کے ہمراہ اسلام آباد ہائیکورٹ میں درخواست دائر کرنے کیلئے آئے تھے جس میں موقف اختیار کیا گیا کہ ان کی جان کو خطرہ ہے اس لیے انہیں ایک اوپن کورٹ میں پیش کیا جائے ۔ انتظامیہ کے مطابق  انہیں نقص امن کے خدشے کے تحت 3 ایم پی او کے تحت گرفتار کیا گیا۔ اسد عمر کے خلاف پرتشدد  مظاہروں کی قیادت کرنے سے متعلق بھی مقدمات درج کئے گئے جو اسلام آباد کے تھانہ آبپارہ اور ترنول میں درج ہیں۔

اسی طرح تحریک انصاف کے رہنما میاں محمود الرشید کے داماد اور سابق رکن اسمبلی میاں اکرم عثمان کو بھائی سمیت گرفتار کرلیاگیا۔ پی ٹی آئی رہنما کے گھر پولیس نے صبح چار بجے چھاپہ مارا ،سیکرٹری محمود الرشید کاکہناتھا کہ پولیس اہلکار گھر کا دروازہ توڑ کر اندر داخل ہوئے ۔ سابق گورنر پنجاب عمر سرفراز چیمہ کو بھی حراست میں لیا گیا ہے۔

تحریک انصاف کے پنجاب سے سابق صوبائی وزیر خیال کاسترو کو پولیس نے گرفتار کر کے نامعلوم مقام پر منتقل کر دیا گیا، خیال کاسترو کو اینٹی کرپشن نے طلبی کے نوٹس جاری کیے تھے ان کے خلاف اختیارات سے تجاوز، کرپشن اور ٹھیکوں میں گھپلوں کی انکوائریاں چل رہی ہیں۔سابق ڈپٹی اسپیکر قومی اسمبلی اور پی ٹی آئی رہنما قاسم سوری نے دعویٰ کیا ہے کہ عمران خان کی گرفتاری کے بعد ہونے والے احتجاج میں شریک ان کی اہلیہ کو گرفتار کرلیا گیا۔بعدازاں ایک ٹوئٹ میں انہوں نے بتایا کہ ان کے بھائی کے گھر پر چھاپہ مار کر اسے اٹھا لیا گیا اور تھانے کے بجائے نامعلوم مقام پر منتقل کردیا گیا۔

۔کراچی میں پی ٹی آئی کے رہنما خرم شیر زمان کا بھائی گھر سے گرفتار کرلیا گیا ۔سندھ پولیس کی جانب سے خرم شیر زمان کی رہائشگاہ پر چھاپہ مارا گیا۔ خرم شیر زمان گھر پر نہیں تھے گرفتاری عمل میں نہیں آسکی ۔ پولیس ان کے بھائی کو اپنے ہمراہ لے گئی۔رات گئے فواد چودھری کو گرفتار کر لیا گیا، اسلام آباد پولیس نے فواد کو سپریم کورٹ کے باہر سے گرفتار کر کے تھانہ سیکرٹریٹ منتقل کر دیا ہے ۔