نواز شریف کےنام لندن میں 3 مہنگی گاڑیاں کس نے رجسٹر کرائیں؟

لندن میں نواز شریف کے دفترکے ترجمان خرم بٹ نے پولیس کو خدشات سے آگاہ کرتے ہوئے بتایا کہ گاڑیاں سابق وزیراعظم کے نام پر رجسٹر کرانے کا مقصد جرائم کر کے تعلق ہمارے ساتھ جوڑنا  بھی ہوسکتا ہے، خدشہ ہے کہ ایسی گاڑیوں کو دہشت گردی، دھوکہ دہی اور مجرمانہ کارروائیوں کیلئے استعمال کیا جاسکتا ہے۔ خرم بٹ نے کہا کہ معاملہ اس وقت سامنے آیا جب نواز شریف کے نام رجسٹر گاڑی کی تفصیل ڈی وی ایل اے نے ایون فیلڈ ارسال کی، مارچ 2023ء میں نواز شریف آفس نے ڈی وی ایل اے کو فراڈ سے متعلق آگاہ کردیا تھا۔انہوں نے کہا کہ اپریل 2023ء میں ایک اور گاڑی سابق وزیراعظم کے نام پر رجسٹر کی گئی، اُن کے نام پر رجسٹر تیسری گاڑی کا اس وقت پتا چلا جب ٹریفک قواعد کی خلاف ورزی کا جرمانہ وصول ہوا۔ چند شرپسند عناصر لیگی قائد کا نام مجرمانہ مقاصد کیلئے استعمال کرنے کی کوشش کر رہے ہیں، دوسروں کے نام پر گاڑی رجسٹر کروانے والے جلد کٹہرے میں ہوں گے، اس واقعہ میں پی ٹی آئی کے سپورٹرز میں ملوث ہوسکتے ہیں۔