ایبٹ آباد میں شوہرکے ہاتھوں بیوی،دوسالیاں اورسالہ قتل،ملزم گرفتار

ڈسٹرکٹ پولیس ترجمان کے مطابق ایبٹ آباد سرکل بکوٹ کے گاؤں لڑی سیداں محلہ چھپراں یونین کونسل پٹن کلاں تھانہ نواں شہر کی حدود میں چار افراد کے قتل اور ایک کے زخمی ہونے کا  افسوسناک واقعہ پیش آیا ہے،جس میں ملزم جعفر ولد شبیر نے فائرنگ کرکےاپنی  30 سالہ  بیوی صائمہ،سالی 26 سالہ ارم ،دوسری سالی  25 سالہ  کرن دختران شیرین ، اور اپنے سالے 13 سالہ زیشان ولد شیرین کو قتل کر دیا جبکہ مقتولہ کرن کے دو سالہ بیٹے محمد علی ولد حفیظ کو زخمی کر دیا۔

مقتولین کی لاشیں اسپتال منتقل کی جا رہی ہیں
واقعے کی اطلاع ملنے پر  پولیس کی بھاری نفری ایس ایچ او تھانہ نواں شہر سردار واجد کے ہمراہ فوری موقع پر پہنچ گئی، اور قاتل کی گرفتاری کے لئے علاقہ کو گھیرے میں لے لیا گیا۔ واضح رہے کہ لڑی سیداں گاؤں کے ساتھ تھانہ نواں شہر ،تھانہ بکوٹ اور تھانہ گڑھی حبیب اللہ کی حدود لگتی ہیں جہاں فوری الرٹ کرکے ناکہ بندی کرلی گئی ۔
ایبٹ آباد پولیس نے موقع پر پہنچ کر لاشوں کو ہسپتال منتقل کردیا،جبکہ ضلع بھر کے داخلی و خارجی راستوں پر ناکہ بندی کرکے قاتل کی گرفتاری کی کوششیں شروع کر دی گئیں۔

ملزم جعفر کی فائل فوٹو
دوسری طرف ریسکیو 1122ایبٹ آباد کے مطابق
۔ریسکیو کنٹرول روم کو اطلاع ملنے پر دو ایمبولینسز بمعہ میڈیکل ٹیکنیشن جائے وقوعہ کی طرف روانہ کی گئیں ۔ریسکیو ٹیم نے 4 نعشوں کو پولیس کی مددسے اٹھا کر ایبٹ آباد ڈی ایچ کیو ہسپتال منتقل کیا ۔

ملزم جعفر کو گرفتار کرنے میں پولیس کامیاب

ایبٹ آباد پولیس نے چند گھنٹے کے اندر ملزم جعفرکو گرفتار کر کےآلہ قتل بھی برآمد کر لیا جس پر ڈی پی او ایبٹ آباد عمر طفیل نے  پولیس ٹیم کے لیے ریوارڈ کا اعلان کیا ہے، پولیس ذرائع کے مطابق واقعے کا نوٹس لیتے ہوئے ڈی پی او ایبٹ آباد عمر طفیل نے اے ایس پی اعتزاز عارف کی زیر نگرانی پولیس کو فوری کاروائی اور ملزم کی گرفتاری یقینی بنانے کے احکامات جاری کیےتھے ، جس پر بروقت کارروائی عمل میں لاتے ہوئے اے ایس پی کینٹ اعتزاز عارف ، ایس ایچ او نواں شہر سردار واجد ، ایس ایچ او مانگل اصغر خان نے ٹیم کے ہمراہ پیشہ ورانہ حکمت عملی اپناتے ہوئےملزم کو آلہ قتل ماؤزر تیس بور سمیت گرفتار کر لیا۔