نواز لیگ کےپی میں بغاوت،امیرمقام کوصدارت سےہٹانےکی قراردادمنظور

تفصیلات کے مطابق ہفتے کے روز پشاور میں مسلم لیگ (ن) خیبر پختونخوا کے نظریاتی ورکرزکے زیر اہتمام کنونشن کا اہتمام کیا گیا جس میں پارٹی کے صوبائی صدر امیر مقام کو ان کے عہدے سے ہٹانے کے لیے قرارداد منظور کی گئی۔
کنونشن میں سابق وزیر آعلیٰ اور گورنر خیبر پختونخوا سردار مہتاب عباسی، سابق صوبائی صدر اور سابق گورنر ظفر اقبال جھگڑا سمیت دیگر پارٹی رہنماؤں  اور کارکنوں نے شرکت کی۔
کنونشن میں انجینئر امیر مقام کو پارٹی کی صوبائی صدارات سے ہٹانے کے لیے قرارداد منظور کی گئی۔

اس موقع پر سردار مہتاب عباسی نے کنونشن سے خطاب کرتے ہوئے کہا کہ پاکستان کا سیاسی ڈھانچہ تباہ و برباد ہوچکا ہے، ان کا کہنا تھا کہ سیاسی ڈھانچے کی تباہی میں تمام سیاسی جماعتیں شامل ہیں، آج ہماری عدلیہ، پارلیمان اور اسٹیبلشمنٹ میں بھی تقسیم کا شکار ہے،انہوں نے امیر مقام کا نام لیے بغیر کہا کہ (ن) لیگ میں عام ورکر کی جگہ انوسٹرز نے لے لی ہے۔
سیاسی مبصرین کے مطابق امیر مقام کے خلاف بغاوت اور انہیں صوبائی صدارت سے ہٹانے کا مطالبہ نواز لیگ کے لیے بہت بڑا دھچکا ہے۔ یہ صورت حال ایک ایسے موقع پر پیدا ہو رہی ہے جب مسلم لیگ نون کو اپنے سیاسی گڑھ پنجاب میں بھی تحریک انصاف کے ہاتھوں بڑے چیلنج کا سامنا ہے جبکہ خیبر پختونخوا میں بھی پارٹی تقسیم در تقسیم کا شکار ہو رہی ہے۔