قدیمی گورنمنٹ گرلز ہائی سکول مری کو اپ گریڈ کر کے گریڈ 19 کی آسامی پر پرنسپل تعینات کی جائے

دراصل محکمہ تعلیم کا یہ ظالمانہ عمل ہزاروں غریب طالبات کے مستقبل کو تاریک کرنے کی سازش تھی۔  سابق دور حکومت میں گلی محلوں کے سکولوں کو بھی اپ گریڈ کیا گیا لیکن مری شہر کی عظیم قدیمی چار کنال اراضی پر محیط تعلیمی درسگاہ توجہ سے محروم رہی۔ ناروا سلوک کا اندازہ اسی امر سے لگایا جا سکتا ہے کہ اس درسگاہ میں آنے والی غریب طلبات پانی کی بوند بوند کو ترس رہی ہیں۔  تحصیل ایڈمنسٹریشن مری، محکمہ واٹر سپلائی والے سکول کو ہر تیسرے دن 20 منٹ کے لیے پانی کی سپلائی فراہم کرتے ہیں۔  جب کہ اس درسگاہ میں پانچ سو طالبات زیر تعلیم ہیں، اساتذہ ہیں، سٹاف ہے۔ پانی کی یہ مقدار تو اتنے لوگوں کے پینے کے لیے بھی ناکافی ہے۔  واش روم میں استعمال کے لیے پانی کی عدم دستیابی کی شکایت کیا کی جائے۔

سکول کی مین باؤنڈری ٹوٹ پھوٹ کا شکار ہے۔ جس کی وجہ سے چھ کمرہ جات پر تعمیر شدہ نئے بلاک بھی خطرے میں آ ہے۔  محکمہ بلڈنگ کے افسران کو متعدد بار سکول کی باؤنڈری کی تعمیر کے لیے درخواستیں دی گئیں ہیں لیکن کئی سالوں سے دفتری خانہ پری کے لیے صرف دوروں پر اکتفا ہے۔

اس قدیمی سکول میں عرصہ سے ہیڈ مسٹریس کی آسامی پر نہیں کی گئی۔  ستم ظریفی کی انتہا یہ ہے کہ عارضی چارج پر ایک ٹیچر ہیڈ مسٹریس کے فرائض سر انجام دے رہی ہیں۔ سکول کے عملے کی تعداد 25 کے قریب ہے۔

سکول میں زیر تعلیم پانچ سو سے زائد طالبات تہار جاوا، چٹہ موڑ، کھنی تاک، بن کوٹل، دریا گلی، سندھیاں، کلڈنہ، سنی بنک، ہل ٹہولو، نمبل، لوئر ٹوپہ اور مری شہر سے تعلیم حاصل کرنے آتی ہیں۔  لیکن سہولیات کی عدم دستیابی کی صورت حال یہ ہے کہ پانی جیسی بنیادی سہولت بھی موجود نہیں۔ محکمے کی مجرمانہ غفلت کا سخت نوٹس لیتے ہوئے عوامی حلقوں، مقتدر سماجی شخصیات، فلاحی و رفاہی تنظیموں کے ساتھ ساتھ  رورل ایریاز ڈویلپمنٹ آرگنائزیشن (RADO) نے شدید احتجاج کرتے ہوئے اعلیٰ احکام سے اس قدیمی درسگاہ کو ہائر سکینڈری کا درجہ دے کر فوری اپ گریڈ کرنے کا مطالبہ کیا ہے۔

یاد رہے کہ اس قدیمی سکول میں ہر سال بورڈ کے سنٹر میں دیگر سکولوں کی سینکڑوں طالبات بھی امتحان دینے کے لیے آتی ہیں۔ اس مرتبہ صبح کے سیشن میں 270 جب کہ شام میں 240 طالبات کلاس نہم کا امتحان دے رہی ہیں۔  لیکن سہولیات کے ضمن میں جیسے کہ ہم نے پہلے ذکر کیا ہے کہ پینے کا صاف پانی تک میسر نہیں ہے۔

اعلی افسران سیزن کے دوران موسم سے لطف اندوز ہونے اور ٹی اے ، ڈی اے کے فوائد حاصل کرنے کے لیے روایتی دوروں کا سلسلہ تواتر کے ساتھ جاری رکھتے ہیں۔ لیکن انھوں نے کبھی مسائل کی رپورٹ بنا کر پیش کرنے کی زحمت گوارا نہیں کی۔ حال آنکہ طالبات کی اتنی بڑی تعداد کے لیے اب اس قدیمی سکول کی عمارت بھی ناکافی ہو چکی ہے۔ پرنسپل کی تعیناتی معرض التوا میں ہے۔ مرمتی کام پر کوئی توجہ نہیں دی جا رہی۔ ٹیچرز ٹریننگ کے حوالے سے کوئی اقدامات نہیں کیے جا رہے۔ طالبات کے لیے غیر نصابی سرگرمیوں اور سپورٹس کی سہولیات کا کیا مذکور۔

ہم وزیراعظم پاکستان، وزیر اعلیٰ پنجاب اور سیکرٹری تعلیم،  پنجاب کی توجہ اس اہم مسئلے کی جانب مبذول کرواتے ہوئے درخواست کرتے ہیں کہ اس قدیمی گرلز ہائی سکول کو اپ گریڈ کرنے کے احکامات جاری کیے جائیں۔ نیز سہولتوں کے فقدان کا نوٹس لیتے ہوئے متعلقہ محکموں کو فوری طور پر سہولیات ضروریہ کی فوری فراہمی کے احکامات جاری کیے جائیں۔  نیز ہیڈ مسٹریس کی ڈی گریڈ آسامی کو دربارہ اپ گریڈ کرکے مستقل ہیڈ مسٹریس تعینات کی جائے۔

ہم علاقے کے سیاسی عمائدین اور اثر و رسوخ رکھنے والی شخصیات سے بھی گزارش کرتے ہیں کہ اس ضمن میں اپنا کردار ادا کریں۔

۔۔۔۔۔۔۔۔۔۔۔۔۔۔

صاحب تحریر عبدالرحیم عباسی

جنرل سیکریٹری

RADO