ریلی نکالنے پر تحریک انصاف کی تین خواتین سمیت سات کارکن گرفتار

پولیس نے ایف نائن پارک کے سامنے سے تحریک انصاف کے کارکنوں کو گرفتار کیا ، گرفتار کارکنوں میں ناصر ،جمیل ،محمد الیاس اور سلیمان کے علاوہ  خواتین کارکنوں میں شمائلہ ، رابعہ اقبال اور مہوش شامل ہیں، پولیس کا کہنا ہے کہ دفعہ 144کی خلاف ورزی پر پی ٹی آئی کے کارکنوں کو حراست میں لیا گیا ۔واضح رہے کہ پی ٹی آئی کو اسلام آباد میں ریلی کی اجازت نہیں ملی تھی۔

دریں اثناوفاقی پولیس نے تحریک انصاف کی گرفتار خواتین کارکنوں کو رات گئے  شخصی ضمانت پر رہا کر دیا ، ترجمان پولیس کے مطابق اسلام آباد میں دفعہ 144کی خلاف  ورزی پر کارروائی عمل میں لائی گئی تھی ، امن عامہ کے قیام کو یقینی بنانے کےلیے قانون شکن افراد کو گرفتار کیا گیا ہے۔ ترجمان کا کہنا ہے کہ 3 خواتین مظاہرین کو  خواتین پولیس آفیسرز نے حراست میں لیا ۔جنہیں شخصی ضمانت پر رہا کردیا گیا ہے۔انہوں نے بتایا کہ کل 15 افراد کی گرفتاری عمل میں لائی گئی ہے۔ترجمان کا کہنا تھا کہ قانون سب کےلیے برابر ہے ۔ تمام افراد کو بارہا بتایا گیا کہ اسلام آباد میں جلسےجلوس کی اجازت نہیں ہے۔متنبہ کرنے کے باوجود قانون کی خلاف ورزی کی گئی جس پر قانون حرکت میں آیا۔