سول اسپتال مری کی زمین پر قبضے کی کوشش ناکام

مری کی پندرہ یونین کونسلوں کے لاکھوں عوام کیلئے صحت سہولت کے واحد  سرکاری مرکز سول اسپتال مری کی اراضی پر قبضے کی کوشش ناکام ہوگئی، عدالت نے کئی برسوں سے ذیر قبضہ زمین واگزار کرنے کا حکم دے دیا ،جس پر عوام اور سماجی حلقوں نے مسرت کا اظہار کیا ہے۔

سول اسپتال مری کے ایم ایس ڈاکٹر عبدالسلام وکیل کے ہمراہ پریس کانفرنس سے خطاب کر رہے ہیں

اس حوالے سے موصولہ تفصیلات کے مطابق سول جج مری محمد ذیشان نے تحصیل ہیڈکوارٹر اسپتال مری کی اراضی پر قبضے کے حوالے سے مقدمے کا فیصلہ پانچ سال بعد سنا دیا ہے۔ہسپتال کے ایم ایس ڈاکٹر عبدالسلام نے مقدمے کے وکیل ایڈوکیٹ ناصر عباسی کے ہمراہ پریس کانفرنس سے خطاب کرتے ہوئے بتایا کہ ہسپتال کی تقریبا تیرہ مرلے اراضی پر قبضے کا کیس 2018 سے سول جج مری کی عدالت میں زیر سماعت تھا۔ملحقہ اراضی پر امداد اللہ نامی شخص کی عمارت ذیر تعمیر ہے جس کا  دعویٰ تھا کہ اسپتال نے تجاوزات قائم کر رکھی ہیں اور اس بہانے قیمتی اراضی پر قبضہ کر لیا گیا۔

انہوں نے بتایا کہ اسپتال انتظامیہ نے اپنے وکیل کے ذریعے مقدمہ لڑا اور جمعہ کے روز عدالت نے ہسپتال کی اراضی پر قبضہ ختم کرکے اس کی واگزاری کا حکم دے دیا ہے جومری اور ملحقہ علاقوں کے عوام کے لئے بہت بڑی خوشخبری ہے۔ ان کا کہنا تھا کہ ہسپتال کی مزید اراضی پر قبضے کی کوششیں اب بھی جاری ہیں لیکن عوامی حمایت سے اس ایسی ہر کوشش کو ناکام بنایا جائے گا۔دریں اثنا مری ڈویلپمنٹ فورم اور عام آدمی لیگ کے رہنماؤں نعمان عباسی ،حماد سکندر عباسی، عثمان نذیر عباسی ،نقاش عباسی اور دیگر نے اسپتال کی اراضی واگزار کرانے کے لئے میڈیکل سپرنٹنڈنٹ ڈاکٹر عبدالسلام کی خدمات کو خراج تحسین پیش کرتے ہوئے کہا ہے کہ مری کے نوجوان قبضہ مافیا کی ہرکوشش ناکام بنانے کے لیے اسپتال انتظامیہ کے ساتھ کھڑے ہیں اور کھڑے رہیں گے۔