14 مئی کو الیکشن کا حکم برقرار ہے۔ سپریم کورٹ کا تحریری فیصلہ جاری

27 اپریل کی سماعت کے حوالے سے سپریم کورٹ کی جانب سے جمعرات کو جاری کردہ تین صحفات پر مشتمل تحریری حکم نامے میں کہا گیا ہے کہ اٹارنی جنرل نے عدالت کو حکومت اور اپوزیشن کے درمیان رابطوں سے آگاہ کیا، جبکہ فاروق نائیک نے چیئرمین سینیٹ کے کردارسے عدالت کو آگاہ کیا۔

تحریری حکم نامے کے مطابق  عدالت عظمٰی نےسیاسی جماعتوں کو مذاکرات کی کوئی ہدایت نہیں کی،یہ مذاکرات ان کی اپنی کوشش ہے، سپریم کورٹ کا14مئی کوانتخابات کرانےکاحکم برقرار ہے۔

واضح  رہے کہ گزشتہ سماعت پر چیف جسٹس نے ریمارکس دیے تھےکہ عدالت مذاکرات پر مجبور نہیں کرسکتی ،سیاسی جماعتیں آئین کے لیے ایک دوسرے کے ساتھ بیٹھیں۔ہم آئین پر عملدرآمد چاہتے ہیں۔اس موقع پر چیف جسٹس کا کہنا تھا کہ عدالت کا کوئی حکم نہیں صرف تجویز ہے، قومی مفاد اور آئین کے تحفظ کے لیے اتفاق نہ ہوا تو جیسا ہے ویسا ہی چلےگا۔

بعد ازاں حکومت اور تحریک انصاف کے درمیان مذاکرات کے تین دورہوئے تاہم کوئی بریک تھرو نہ ہو سکا جس کے بعد گذشتہ روز  تحریک انصاف نے مذاکرات کے حوالے سے رپورٹ  سپریم کورٹ میں جمع کرادی ،جس کے بعد سپریم کورٹ میں اس کیس کی سماعت جمعے کو صبح ساڑھے 11 بجے مقرر کی گئی ہے۔